Fréttir

Frábær ferð á Íslandsmót - Skellur Íslandsmeistari A-liða í 5. flokki

Blak | 05.04.2011  

Það er óhætt að segja að ferðin á seinni hluta Íslandsmótsins í Mosfellsbæ um helgina með yngri flokka Skells hafi tekist vel. Krakkarnir stóðu sig eins og hetjur öll sem eitt og voru félaginu til sóma jafnt utan valla sem innan.  Hér að neðan er fyrst farið yfir árangur liðanna á mótinu og síðan kemur ferðasagan í stuttu máli. Myndir úr ferðinni eru komnar inn á myndasíðuna.

 

A-lið Skells í 5. flokki náðu þeim ótrúlega árangri að verða Íslandsmeistarar A-liða eftir mikla baráttuleiki þar sem þessir krakkar sýndu svo sannarlega úr hverju þau eru gerð. Þetta er sama lið og varð Íslandsmeistari C-liða í fyrra og nú eins og þá áttu þau í mikilli baráttu við sprækt og skemmtilegt lið Aftureldingar um Íslandsmeistaratitilinn. Liðin tvö voru jöfn að stigum eftir báðar umferðir Íslandsmótsins en Skellur hafði tapað einni færri hrinu og fengu því bikarinn. Þau voru farin að spila einstaklega fallegt blak undir lok mótsins í Mosfellsbæ með móttöku og smössum sem meistaraflokkarnir okkar hefðu verið fullsæmdir af. Það væri gaman að vita hvort mörg lið í boltaíþróttum á Ísafirði hafi orðið Íslandsmeistarar A-liða áður.

B-lið Skells í 5. flokki náðu í bronsið í deild B-liða sem er mjög góður árangur. Liðið er samsett úr leikmönnum frá bæði Suðureyri og Ísafirði. Þau náðu sterkri liðsheild og spiluðu öruggt og gott blak sem skilaði þeim á verðlaunapall.

C-lið Skells í 5. flokki endaði í 7. sæti í deild B-liða stúlkna. Liðið skipa ungar stúlkur frá Suðureyri sem eru flestar að spila upp fyrir sig og eiga því framtíðina fyrir sér í blakinu og verður gaman að sjá þær blómstra á næstu mótum. Þær eru kappsamar og duglegar og miklar íþróttakonur.

Lið Skells í 4. flokki stúlkna endaði í 8. sæti í deild B-liða stúlkna. Þær eru að keppa við mjög erfið lið á þessum mótum en Skells-liðið óx og dafnaði með hverjum leik. Undir lokin var komið fallegt spil hjá þeim sem mun halda áfram að þróast.

 

Við flugum frá Ísafirði í fallegu veðri í hádeginu á föstudegi 1. apríl. Flogið var yfir Súgandafjörð, Dýrafjörð og Arnarfjörð og hafði Jamie þjálfari það á orði að hugsanlega væri þetta það fallegasta sem hún hefði nokkurn tímann séð. Við keyrðum með krakkana beint upp í Egilshöll þar sem farið var á skauta. Allir skemmtu sér vel og sjá mátti ýmiss góð tilþrif á svellinu. Sumir komust meira að segja í íshokkí. Eftirköstin urðu hinsvegar nokkrar blöðrur á iljum, en það kom ekki mikið að sök. Eftir skauta var borðað nesti og skemmtiatriði æft. Þeir sem áttu leið um Egilshöll fengu því óvænta skemmtun. Allir fóru í bíó kl. 17:20 á þrjár mismunandi myndir. Eftir bíó var farið á Hróa Hött í Mosfellsbæ og flatbökur hurfu ofan í svanga krakka. Síðan var farið í skólann þar sem við gistum. Það er alltaf mikið fjör að hitta krakkana frá hinum liðunum og þau eru farin að kannast hvert við annað.

Á laugardeginum var spilað blak allan daginn og síðan farið í sund fyrir kvöldmat. Eftir kvöldmat var kvöldvaka þar sem voru ýmiss skemmtiatriði og leikir. Krakkarnir okkar sungu öldungalagið frá Ísafirði "smass yfir netið" og dönsuðu með og sýndu ýmsar kúnstir. Venni spilaði undir af stakri snilld. Myndir frá kvöldvökunni segja meira en mörg orð.

Á sunnudeginum átti hvert lið einn leik, og svo heppilega vildi til að þeir voru allir á sitt hvorum tímanum þannig að krakkarnir gátu hvatt hvert annað. Síðan tók við svolítil bið eftir verðlaunaafhendingu því mótshaldarar þurftu að reikna niðurstöður tveggja móta. Meðal annars þurfti að fara vel yfir stöðuna í deild A-liða í 5. flokki þar sem Skellur og Afturelding voru nánast hnífjöfn í fyrsta sætið, en eins og áður segir náði Skellur bikarnum á færri töpuðum hrinum. Þegar liðin okkar voru búin að fá sín verðlaun þurftum við að hlaupa út í bíl og beint á flugvöllinn. Flugið heim var líka einstaklega skemmtilegt í góðu veðri þar sem flogið var niður Engidalinn. Gott var að komast aftur í sólina á Ísafirði eftir dvölina í íþróttahúsinu.