Fréttir

Eimreiðin gengur enn – KFÍ-b enn ósigraðir!

Körfubolti | 15.11.2015

Eins og alþjóð veit þá hefur B-lið KFÍ verið að taka Íslandsmótið með stormi á síðustu vikum og hafði fyrir helgina byrjað tímabilið á þremur öruggum sigrum í röð í 3. deildinni. Í hverjum leik hefur dregin hefur verið dreginn á flot, líkt og strandaður hvalur af strönd, hver fræknari kempan úr sögu KFÍ af fætur annari. Í leik liðsins á helginni var engin breyting á því.

Ákveðið var að styrkja KFÍ B fyrir leikinn gegn Stjörnunni B og ná í fleiri kempur frá fyrri leiktímabilum KFÍ. Skrifstofa KKÍ þurfti að leita djúpt í rykföllnum skjalageymslum sínum að síðustu félagsskiptum nokkra leikmanna sem voru að skipta aftur í KFÍ eftir talsvert langa fjarveru. Hrafn Kristjánsson, Þórður Jensson (Doddi), Unnar Hermansson og Jóhannes Bjarni Guðmundsson hafa allir skipt aftur í KFÍ og brátt að vera komin endanleg mynd á liðið. Unnar og Jóhannes Bjarni byrja endurkomuna á meiðslalistanum.

Aðspurður um hvort kostnaðurinn við öll þessi félagsskipti væri ekki farinn að sliga fjárhag félagsins benti einvaldur B-liðsins, Shiran Þórisson, á gjaldkera KFÍ, áðurnefndan Shiran Þórisson, sem vildi ekkert tjá sig um málið.

Í öðrum leikmannafréttum var það helst að Florijan Jovanov fékk loksins grænt ljós frá einvaldi liðsins til að spila með liðinu. Florijan hafði þetta að segja um ákvörðunina:

“ Það hefur lengi verið draumur minn að spila með þessum lykilleikmönnum KFÍ fyrri ára , ég bara hreinlega trúi ekki að þessi stund sé komin”.

Florijan þurfti að pissa 10 sinnum fyrir leik og fékk svo aðhlynningu frá sjúkraþjálfara liðsins þar sem spenningurinn var að bera hann ofurliði. Jafnframt var annar nýliði í liðinu en Helgi Bergsteins fékk einnig leyfi til að vera með liðinu. Helgi var reyndar ennþá með snuð þegar kempurnar voru að vinna sínu sætustu sigra og lofaði að fara á fyrirlestur hjá Gaua Þorsteins um sögu félagsins til þess að átta sig á samhengi hlutanna.

Leikurinn við Stjörnuna B var sveiflukenndur en að lokum landaði díselvélin sigrinum með sínum alkunnu langskotum með 91 stigi gegn 73 stigum Stjörnumanna. Það sást stöku sinnum glitta í varnarleik KFÍ manna, sem enn eru að fínstilla afbrigði af maður á mann svæðisvörn en ljóst er að það mun taka nokkrar æfingar til viðbótar. Það gæti verið vandamál þar sem æfingar liðsins eru færri en leikirnir.

Florijan var besti maður vallarins og byrjaði á fullum krafti í fyrsta leikhluta og var beðinn um að róa sig niður, hann setti 18 stig í leikhlutanum og reyndari menn gerðu sitt besta til að hægja á samherja sínum. Hann komst í takt við liðið í öðrum og þriðja leikhluta en stakk svo aftur af í fjórða leikhluta þegar hann setti 12 stig. Hann endaði leikinn með 37 stig.

Baldur varð fyrir því óláni í upphafi leiks að stíga á línu í einu þriggja stiga skotanna sína og tuðaði í dómurunum sem aðvöruðu hann fyrir leikararskap. Pétur Már var fyrstu þrjá leikhlutana að stilla miðið og setti í þeim eingöngu niður einn þrist.

Stjarnan komst nærri því að jafna leikinn í þriðja leikhluta en í fjórða leikhluta voru byssurnar búnar að stilla miðin. Skyttur Stjörnumanna spreyttu sig á móti skyttum KFÍ, skemmst er frá því að segja að það bar ekki árangur hjá Stjörnunnni. Pétur setti niður 5 þrista í fjórðungnum og Baldur einn, en Baldur var enn tuðandi yfir því að hafa stigið á línu í fyrsta leikhluta .

Glímukóngurinn Stígur reif niður þó nokkur sóknarfráköst og kláraði tvö færi af alkunnri harðfylgni. Stígur lagði einnig liðsfélaga sinn Andra í glímu um byrjunarliðssæti í upphitun. Hrafn Kristjánson lét til sín taka í stoðsendingunum og mataði hann liðsfélaga sína af gamalkunnri snilld, hann sendi einnig tvisvar á dómarann sem fannst það ekki fyndið. Helgi var sprækur í leiknum og nýtti tækifæri sitt vel og keyrði ítrekað í þvöguna og hafði oftast ekkert annað úrræði (að eigin sögn) en að skjóta sjálfur. Doddi spilaði að venju góða vörn og var litinn hornauga af liðsfélögunmum fyrir vikið, hann setti niður tvö stuttdræg skot.

Þjálfarinn var eitthvað lítill í sér innan um allar stjörnunnar og gerði eiginlega ekkert, hvorki í vörn (sem er ekki nýtt), né í sókn (sem er nýtt), en náði að lauma inn nokkrum stoðsendingum. Líkt og þjálfarinn þá komst Andri Már Einarsson ekki á blað en náði tveimur stoðskrínum og er enn að jafna sig eftir glímuna.

Með sigrinum heldur B-liðið enn efsta sæti 3. deildarinnar en næsti leikur liðsins er 28. nóvember þegar Gnúpverjar koma í heimsókn.


Stigaskor:

Florijan 37 stig
Pétur 20 stig
Baldur 18 stig
Helgi 6 stig
Stígur 4 stig
Doddi 4 Stig
Hrafn 2 stig

Deila