Fréttir

KFÍ semur við Nökkva Harðarson

Körfubolti | 15.05.2015
Nökkvi Harðarson handsalar nýundirritaðann samning við Ingólf Þorleifsson formann KFÍ.
Nökkvi Harðarson handsalar nýundirritaðann samning við Ingólf Þorleifsson formann KFÍ.

KFÍ hefur samið við ungan og efnilegan leikmann úr Grindavík, Nökkva Harðarson, um að leika með liðinu næstkomandi vetur. Nökkvi, sem er 19 ára, varð á dögunum Íslandsmeistari með sameiginlegu liði drengjaflokks UMFG og Þórs Þorlákshöfn en lék einnig með meistaraflokki Grindvíkinga í Domino's deild karla á liðnu tímabili og kom við sögu í 7 leikjum. Hann er uppalinn hjá UMFG en hefur einnig verið á venslasamningi hjá 2. deildar liðinu  ÍG undanfarin tvö tímabil og varð meðal annars 2. deildarmeistari með þeim tímabilið 2013-2014.

 

Nökkvi er 193 cm framherji sem hefur gott skot og gott vald á boltanum. Hann hefur komið að þjálfun yngri flokka hjá Grindavík og fær afar góða umsögn frá þjálfurum sínum og er eljusamur og duglegur innan vallar sem utan. Í sumar mun hann æfa með Grindvíkingum en mætir svo vestur síðsumars og hefur nám við Menntaskólann á Ísafirði og slæst í hópinn með samherjum sínum í KFÍ.