Vestri - Afturelding á sunnudag

Vestri tekur á móti Aftureldingu í 1. deild kvk kl. 14 á sunnudag. Allir velkomnir - ókeypis aðgangur og heitt á könnunni!

Tveir blakleikir á laugardaginn

Vestri tekur á móti Fylki í 1. deild karla og kvenna nú á laugardag. Allir velkomnir á spennandi leiki - ókeypis aðgangur. Kaffisala til styrktar yngri flokkum.

Góður árangur Vestra á bikarmóti 2.-4. flokks

Bikarmeistarar Vestra í 2. flokki kvk

1 af 3

Vestri sendi þrjú lið á bikarmót 2.-4. flokks í Mosfellsbæ um síðustu helgi. Einnig var skráð 3. flokks lið drengja sem sameinað var með Aftureldingu.

Það er skemmst frá því að segja að Vestra krakkarnir stóðu sig vel.

• Vestri varð bikarmeistari í 2. flokki kvenna eftir sannfærandi sigur á Aftureldingu í úrslitaleik.
• Hjá 2. flokki drengja enduðu Vestrastrákar í 4. sæti eftir tvo sigra og tvö töp.
• Blandað lið frá Vestra keppti í 4. flokki drengja. Í 3. flokki drengja sameinuðu Vestri og Afturelding krafta sína. Bæði þessi lið komust í úrslitaleikinn, en hjá 3. og 4. flokki verða úrslitaleikirnir á sama tíma og bikarúrslit fullorðinna helgina 9.-11. mars. Það verður því frábært tækifæri fyrir þessa krakka til að spila alvöru úrslitaleik við flottar aðstæður.

Sigur í fyrsta leik á nýju gólfi

Fyrstu íþróttakappleikirnir á nýju gólfi í Torfnesi fóru fram laugardaginn 20. janúar. Þá tók Vestri á móti HK B í 1. deild karla og kvenna í blaki og síðan fór fram körfuboltaleikur strax á eftir þar sem Vestri tók á móti ÍA.

Karlarnir riðu á vaðið og áttu hörkuleik á móti ungu og spræku liði HK B. Vestri tapaði fyrstu hrinunni naumlega 23-25, en síðan hrukku Vestra strákarnir í gang og sigruðu þrjár næstu hrinurnar og leikinn þar með 3-1. 

Kvennaleikurinn var hörkuleikur þar sem Vestri tapaði tveimur fyrstu hrinunum, en vann tvær þær næstu. Oddahrinan var æsispennandi en HK náði að stela sigrinum að lokum 15-13 og unnu þar með leikinn 3-2. 

Liðin í 2. flokki hjá sömu félögum spiluðu svo á sunnudeginum. HK fór með sigur af hólmi í báðum leikjunum, 3-1 hjá strákunum og 3-0 hjá stelpunum. Báðir leikirnir voru skemmtilegir og spennandi á að horfa, og gaman að sjá unga og efnilega leikmenn hjá báðum liðum. 

Fjórir heimaleikir „á helginni“

Blaklið Vestra spila fjóra heimaleiki við HK um helgina.  Á laugardaginn fara fram leikirnir Vestri-HK B í 1. deild karla og kvenna kl. 13:30 og 15:30.  Á sunnudagsmorgni spilar 2. flokkur Vestra við HK. Við hvetjum alla til að mæta og horfa á skemmtilega leiki. Stefnt er að því að spila á nýja gólfinu í Torfnesi, en æfing í kvöld, föstudag, sker úr um hvort óhætt þyki að spila á því.

Þrír leikmenn frá Vestra í unglingalandsliðum U17 og U19 kvk.

Sóldís og Katla

Þrír leikmenn frá Vestra komust í lokahópana hjá U17 og U19 liðum kvenna sem spila á Evrópumótum í blaki núna í janúar.

Öruggur útisigur Vestra á Fylki í 1. deild karla

Vestri sigraði Fylki 3-0 í útileik núna í kvöld, 1. des. Vestramenn komu ákveðnir til leiks og sigurinn var sannfærandi. Hinn nýi leikmaður Vestra, Mateusz Klóska, átti góðan leik og ljóst er að Vestramenn voru heppnir að fá þennan pólska Bolvíking til liðs við sig. Kjartan Óli Kristinsson var einnig sterkur og í rauninni áttu allir leikmenn fínan leik. Vestri spilar gegn HK í fyrramálið.

Sætur sigur hjá Vestrakonum

Meistaraflokkur kvenna vann góðan heimasigur á liði Ýmis í 1.deild kvenna um síðustu helgi. Leikurinn var nokkuð kaflaskiptur en Vestrakonur byrjuðu leikinn af miklum krafti og unnu fyrstu tvær hrinurnar. Lið Ýmis kom sterkt inn í þriðju og fjórðu hrinu og allt í járnum, staðan 2-2 eftir fjórar hrinur. Þá var komið að oddahrinu þar sem lið Vestra sýndi hvað í því býr og landaði sigri. Vestri vann því leikinn 3-2. Liðin mættust á heimavelli Ýmis í október s.l. en þá hafði Ýmir sigur 1-3.

Fimm Vestrastelpur í úrtakshópum blaksambandsins í U17 og U19

Fimm stelpur úr Vestra hafa verið valdar á úrtaksæfingar vegna landsliðsverkefna hjá Blaksambandi Íslands. Þær Katla Vigdís Vernharðsdóttir og Sóldís Björt Blöndal komust áfram í 17 manna úrtak fyrir U17 ára landsliðið. Auður Líf Benediktsdóttir, Guðrún Ósk Ólafsdóttir og Monika Janina Kristjánsdóttir eru í 30 manna úrtaki fyrir U19 ára landsliðið. U17 ára liðið tekur þátt í undankeppni EM í Tékklandi 4.-7. janúar og U19 ára liðið tekur þátt í undankeppni EM í Úkraínu 11.-14. janúar.

Blakdeild Vestra er stolt af sínum leikmönnum og óskar stelpunum góðs gengis á úrtaksæfingum

Átta blaklið frá Vestra á ferðinni

1 af 2

Átta blaklið frá Vestra voru á ferð og flugi og spiluðu fjölmarga leiki á höfuðborgarsvæðinu síðustu helgi. 

Meistaraflokkur kvenna vann Fylki 3-1 en tapaði 1-3 fyrir Aftureldingu. 

Stelpurnar í 2. flokki unnu svo Aftureldingu 3-1

Meistaraflokkur karla tapaði 3-0 gegn Aftureldingu

2. flokkur drengja tapaði naumlega 2-3 í spennandi leik gegn HK, en vann Aftureldingu 3-1. 

Íslandsmót að hausti var haldið í Fagralundi í Kópavogi í 5. og 6. flokki og átti Vestri tvö lið í hvorum flokki. Mikið var um góð tilþrif á mótinu og stóðu Vestra krakkarnir sig vel jafnt innan vallar sem utan. Liðin spiluðu mismunandi stig af krakkablaki sem eru blaklíkir leikir þróaðir til að þjálfa unga krakka í blaki. Allir lærðu mikið á mótinu og fór stöðugt fram á meðan á því stóð. Nefna má að 5. flokkur Vestra náði 3. sæti í deild A-liða.