Frábær ferð á Sambíómót

Átökin hjá yngstu KFÍ stelpunum voru engu minni en á meistaraflokksleikjum. Helgi Hrafn þjálfari fylgist spenntur með.

Elstu stelpurnar með Stefaníu þjálfara settu upp sparibrosið rétt áður en þær skruppu í sund í Dalhúsum í Grafarvogi.

Elstu strákarnir og Birgir Örn þjálfari kátir í mótslok.

Strákarnir ráða ráðum sínum með Bigga þjálfara.

Yngstu stelpurnar okkar stóðu sig feikna vel og brostu út að eyrum allt mótið.

Allir fóru í Star Wars liðsmyndatöku og yngstu KFÍ strákarnir tóku sig sannarlega vel út með geislasverðin.

1 af 6

Framtíðin er svo sannarlega björt fyrir KFÍ ef marka má frammistöðu okkar fólks á Sambíómótinu sem fram fór um síðustu helgi. Íþróttafélagið Fjölnir í Grafarvogi hefur staðið fyrir þessu mótshaldi um langt árabil en mótið í ár var það stærsta til þessa með nálægt 600 keppendur. Frá KFÍ mættu hátt í þrjátíu vaskir krakkar á aldrinum 6-10 ára í alls fimm liðum, tveimur strákaliðum og þremur stelpuliðum. Engin stig eru formlega talin og allir fara heim með verðlaunapening í farteskinu.

Stefanía Ásmundsdóttir stýrði sköruglega tveimur liðum stelpna, annað árgangur 2005 og hitt 2006. Stelpurnar stóðu sig sérlega vel en mættu nokkuð hörðum andstæðingum, einkum í eldri hópnum og þurftu að berjast hart fyrir sínu. Þær yngri fóru með sigur af hólmi í tveimur leikjum þótt engin stig væru talin á mótinu. Margir nýliðar eru í hópnum í bland við stelpur sem hafa æft körfubolta frá því að þær voru í Krílakörfu fimm ára gamlar. Hópurinn hefur tekið stórstígum framförum í haust undir stjórn Stefaníu og á mikið inni.

Birgir Örn Birgisson fór fílefldur fyrir strákaliðinu sem keppti í árgangi 2005. Þar er sterkur hópur stráka á ferð og höfðu þeir yfirhöndina í flestum ef ekki öllum leikjum sínum. Þeir hafa flestir æft körfu í u.þ.b. tvö ár og er sannarlega von á góðu með þennan hóp til framtíðar.

Helgi Hrafn Ólafsson stýrði yngstu tveimur liðunum, einu strákaliði og einu stelpuliði. Lið KFÍ stelpna í árgangi 2008 var að stíga sín fyrstu skref í móti og var hreint frábært að sjá taktana hjá þeim. Þar fara sterkar stelpur sem munu gera skemmtilega hluti í framtíðinni með góðu utanumhaldi. Greinilegt er að uppeldið í Krílakörfu KFÍ er að skila sér í góðri boltatækni, samhæfingu og spili.

Það sama má segja um strákalið KFÍ árgangur 2008. Þar eru ótrúlega flottir strákar á ferð sem flestir hófu körfuboltaferilinn í Krílakörfunni en margir þeirra voru þó að þreyta frumraun sína á móti. Frammistaða þeirra var til mikillar fyrirmyndar.

Það má segja um alla keppendur okkar á Sambíómótinuað þeir voru sjálfum sér, foreldrum og félaginu til mikils sóma jafnt innan sem utan vallar. KFÍ foreldrar stóðu sig einnig vel í því að fylgja liðunum eftir en það krefst úthalds og útsjónarsemi að elta ungviðið á jafn viðamiklum mótum og stóru minniboltamótinu eru orðin. Launin eru þó ríkuleg því fátt er skemmtilegra en sjá káta krakka í fjörugum leik undir stjórn afburðaþjálfara sem leiðbeina þeim í hverju skrefi. 

B-liðið brenndi niður netmöskva Akurnesinga

B-liðsmennirnir og brennuvargarnir Baldur Ingi og Pétur Már.

B-lið meistaraflokks KFÍ hélt suður með sjó á sunnudaginn og atti kappi við ÍA-b í 3. deild karla.

Hátt í 30 börn á leið á Sambíómót

Hátt í 30 KFÍ krakkar á aldrinum 7-10 ára eru nú um helgina á leið á sitt fyrsta minnaboltamót í vetur en það er stóra Sambíómótið sem Fjölnir stendur fyrir í Grafarvogi. KFÍ teflir fram 5 liðum að þessu sinni, þremur stelpuliðum og tveimur strákaliðum, en félagið hefur sótt þetta mót um margra ára skeið.

Í vetur er í fyrsta sinn keppt samkvæmt nýjum í yngstu flokkunum þar sem aðeins 3-4 leikmenn eru inni á vellinum í einu. Þannig fá krakkarnir mun meiri spilatíma og fleiri tækifæri með boltann.

Það eru þjálfarakempurnar Birgir Örn Birgisson, Stefanía Ásmundsdóttir og Helgi Hrafn Ólafsson sem leiða liðin um helgina en með í för verður einnig myndarlegur hópur foreldra enda leikmennirnir enn svo ungir.

Yngri flokkar selja grænmeti fimmtudaginn 29. október

Fyrsta fjáröflun vetrarins hjá yngri flokkum KFÍ fer fram fimmtudaginn 29. október en þá ætla krakkarnir að ganga í hús og selja grænmeti. Kartöflur í 2 kg pokum á 1000 krónur, gulrófur í 2 kg pokum á 1000 krónur og gulrætur, 1,3 kg í poka á 1000 krónur. Biðjum við fólk að taka vel á móti þessu unga íþróttafólki og kaupa af þeim hollt og gott grænmeti en afraksturinn af sölunni rennur í ferðasjóðinn þeirra.

KFÍ mætir Val í Poweradebikarnum

KFÍ og Valur mætast á föstudaginn kl 19:15 í Poweradebikar karla á Jakanum.

Líkt og KFÍ þá leikur Valur í 1. deildinni en þeir sitja þar ósigraðir á toppnum eftir sannfærandi sigra á móti Skallagrím og Fjölni sem bæði féllu úr úrvalsdeildinni síðastliðið vor.

Við minnum á að miðaverðið er aðeins 1.000 kr. Athugið að leikurinn verður ekki sýndur í beinni og því um að gera að koma á Torfnes og styðja við strákana. Áfram KFÍ!

Drengir upp um riðil og stelpurnar að gera flotta hluti

KFÍ drengirnir að loknum fyrsta leik gegn Stjörnunni b - lokatölur 47-34.

KFÍ stúlkurnar í hörkuleik gegn Haukum sem tapaðist naumlega 10-14.

1 af 2

Það var mikið um að vera hjá báðum 8. flokkum KFÍ um nýliðna helgi en þá fór fram fyrsta umferð í Íslandsmótinu í þessum aldurshópi. Drengirnir sóttu Hauka heim í Hafnarfjörð í D-riðli og stúlkurnar voru gestgjafar á Ísafirði, sömuleiðis í D-riðli. Bæði liðin eru ný í Íslandsmóti og hófu því leikinn í neðsta riðli samkvæmt reglum KKÍ. Liðin eru skipuð 12 og 13 ára leikmönnum, en það eru krakkar í 7. og 8. bekk grunnskóla.

Drengirnir gerðu sér litið fyrir og sigruðu alla fjóra leiki sína í Hafnarfirði og eru komnir upp í C-riðil. Þeir unnu b-lið Stjörnunnar 47-34, lið Hauka var lagt með 52-24, Valur laut í lægra haldi fyrir okkar mönnum 51-16 og c-lið Stjörnunnar, sem skipað er reynsluminnstu drengjum þess félags varð að sætta sig við 47-16. Af tölunum má sjá að mikill getumunur var á liðunum en lið KFÍ er að stórum hluta skipað drengjum sem alla tíð hafa spilað upp fyrir sig og eru nú í fyrsta sinn að mæta jafnöldrum í Íslandsmóti. Liðið er einnig skipað tveimur Strandamönnum en KFÍ er í góðu samstarfi við Héraðssamband Strandamanna um leikmenn í 8. og 10. flokki drengja.

Hákon Ari Halldórsson er þjálfari 8. flokks drengja og hefur honum tekist mjög vel upp í að skapa góða liðsheild og gott samspil hjá drengjunum. Það verður spennandi að fylgjast með framgangi þessa unga drengjaliðs KFÍ í vetur. TIl hamingju með C-riðilinn strákar!

Það var ekki síður spennandi að sjá hvernig spánýju liði 8. flokks stúlkna myndi reiða af í sínu fyrsta Íslandsmóti en liðið er m.a. skipað stúlkum sem byrjuðu að æfa körfubolta í haust og eru því að stíga sín fyrstu skref á vellinum. Skemmst er frá því að segja að stelpurnar stóðu sig frábærlega og börðust af mikilli hörku. Þær urðu að lúta í lægra haldi fyrir liði Stjörnunnar 36-25, en Stjörnustelpurnar komust upp úr riðlinum. Hörkuleikur gegn Haukum hefði auðveldlega getað endað með sigri en tapaðist á lokamínútunni 10-14.KFÍ stelpurnar sigruðu hinsvegar lið Vals örugglega 41-13.

Nökkvi Harðarson er þjálfari stúlknanna en hann teflir fram tveimur stúlknaliðum á Íslandsmóti í vetur, 7. flokki og 8. flokki. Æfingahópurinn telur hátt í 20 stúlkur og er því sá langstærsti hjá félaginu um þessar mundir - hann slær meira að segja meistaraflokk karla út í þessari deild. Nökkvi er að gera flotta hluti með hópnum, með Hákon Ara sem aðstoðarþjálfara, og verður bæði spennandi og skemmtilegt að fylgjast með þessum stóra stúlknahópi til framtíðar. Áfram stelpur!

B-liðið með úthaldssigur á móti Grundarfirði

Mekka Vestfirsks körfubolta: Bolungarvík.

B-lið KFÍ hóf leik í 3. deild karla á laugardaginn þegar það tók á móti Grundfirðingum í Gryfjunni í Bolungarvík.

Sterkur sigur á Reyni

Kjartan átti stórgóðan leik. Mynd: Halldór Sveinbjörnsson

Rúnar skoraði sín fyrstu meistaraflokksstig og var fagnað af samherjum í lokin. Mynd: Halldór Sveinbjörnsson

1 af 2

KFÍ vann sinn fyrsta sigur í vetur gegn Reyni frá Sandgerði á Jakanum í kvöld 85-53. Gríðarlega sannfærandi og sterkur sigur og gott veganesti í komandi leiki. Nú er mikilvægt að halda haus og halda áfram að byggja ofan á framfarir síðustu vikna.

KFÍ tekur á móti Reyni Sandgerði

Birgir Örn Birgisson þjálfari KFÍ og lærisveinar hans mæta Reyni frá Sandgerði á föstudaginn kl. 19:15 hér heima. Ljósmynd: Halldór Sveinbjörnsson.

Nú styttist í næsta heimaleik KFÍ. Strákarnir mæta nýliðunum Reyni úr Sandgerði á Jakanum föstudaginn 23. október kl. 19:15.

Segja má að undirbúningstímabilið hjá Reyni hafi verið álíka brokkgengt og hjá KFÍ. Í fyrstu umferð deildarkeppninnar töpuðu þeir svo gegn ÍA á útivelli með átta stiga mun. Það má því búast við hörkuleik á föstudagskvöldið kemur enda bæði liðin án sigurs eftir fyrstu umferð. Okkar menn eru staðráðnir í að landa fyrsta sigri tímabilsins og Reynismenn verða örugglega ekki léttir viðureignar.

Þess má svo geta að nýir búningar KFÍ verða vígðir í leiknum!

Veðurspáin fyrir föstudaginn er ekki sérlega góð sem stendur og því verður látið ráðst hvort tendrað verði undir Muurikka pönnunni. Fylgist með Facebook síðu KFÍ fyrir frekari tíðindi þess efnis.

Við minnum á að miðaverðið er aðeins 1.000 kr. og að bein útsending Jakans-TV verður á sínum stað.

Allir að mæta á Torfnes og styðua við strákana. Áfram KFÍ!

„Hrikalega ánægður með stelpurnar“

Lið KFÍ sem keppti í B-riðli Íslandsmóts 7. flokks stúlkna um helgina ásamt Nökkva Harðarsyni þjálfara.

Nökkvi peppar liðið upp eftir tapið í fyrsta leik. Annar leikur liðsins var háspennuleikur sem endaði í framlengingu.

1 af 2

Stelpurnar í 7. flokki KFÍ hófu leik í fyrstu umferð Íslandsmótsins í B-riðli um helgina en riðillinn fór fram á heimavelli KR í Frostaskjólinu.

Allir þrír leikir mótsins fóru fram á laugardeginum og hófu KFÍ leik gegn Stjörnunni. Stjörnustúlkur eru með sterkt lið og unnu þær leikinn örugglega. Okkar stelpur sýndu fína takta en voru alltaf skrefinu á eftir. Lokatölur 44-21 Stjörnunni í vil. Þess má geta að Stjarnan vann öruggan sigur í öllum leikjum sínum riðlinum og spilar því í A-riðli í næstu umferð.

Í öðrum leiknum, gegn KR, var allt annað að sjá til KFÍ stelpna. Baráttan var mikil og var leikurinn mjög jafn. KFÍ stelpur voru óheppnar að missa leikinni í framlengingu og lukkan gekk ekki í lið með þeim í framlengingunni því KR stelpur mörðu sigur 28-26. Að sögn farastjóra liðsins, Jóhanns Birkis Helgasonar, var leikurinn svo spennandi að stúkan stóð á öndinni. „Þetta var eins og að horfa á landsleik!“, sagði Jóhann Birkir að leik loknum og hrósaði Nökkva Harðarsyni þjálfara fyrir hve vel hann stýrði liðinu í þessum spennuþrungna leik.

Í síðasta leiknum mættu KFÍ stelpur Njarðvík B. Þá voru stelpurnar orðnar þreyttar og ekkert vildi ofan í. Lokatölur 22-12 Njarðvík í vil og fall KFÍ í C-riðil staðreynd.

Nökkvi Harðarson, þjálfari stelpnanna var engu að síður ánægður með framistöðu liðsins á mótinu. „Ég er hrikalega ánægður með stelpurnar. Þær eiga mikið hrós skilið þó að úrslitin hafi ekki verið eins og maður óskaði sér. Þær hafa tekið gríðarlegum framförum og ég er mjög ánægður með þær. Með aðeins minna stessi og smá heppni hefðu úrslitin getað orðið öðruvísi. En nú er bara að halda áfram og gera betur í næstu umferð.“

Næsta umferð stelpnanna í 7. flokki fer fram dagana 21.-22. nóvember. Það er þó skammt á milli stórræða hjá þessum efnilegu stelpum því margar þeirra munu einnig taka þátt í fyrstu umferð C-riðils Íslandsmótsins með 8. flokki KFÍ. Riðillinn fer fram hér heima á Ísafirði ein stelpurnar mæta Stjörnunni, Haukum og Val B. Sömu helgi mun 8. flokkur drengja spila í fyrstu umferð D-riðils í Hafnarfirði. Mótherjar strákanna verða Haukar, Stjarnan C, Valur B og Stjarnan C. Helgina þar á eftir, 31. október til 1. nóvember, fer svo fram Sambíóamótið þar sem iðkenndur KFÍ í minnibolta munu fjölmenna. Tíundi flokkur drengja, sem spilaði sína fyrstu umferð á Íslandsmótinu hér heima um daginn, keppa svo næst helgina 7.-9. nóvermber.

Það er því nóg um að vera í yngri flokka starfinu á næstu vikum.