Komnir heim reynslunni ríkari

Góð æfingaferð í alla staði

Meistaraflokkur KFÍ fór í örferð suður og spilaði tvo æfingaleiki gegn Borgarnesi og Hamar. Þessir leikir voru liður í að sjá hvar við stöndum í æfingaferlinu og sjá hvað má bæta fyrir mótin í vetur. Fimmtán manna hópur fór í ferðina og fengu allir að spila.

Fyrsti leikur okkar var gegn Borgarnesi og vannst hann 99-57. Þess ber þó að geta að Borgnesingar eiga eftir að fá báða sína erlendu leikmenn og var Pálmi líkt og Pétur að leyfa öllum ungu strákunum að spreyta sig. Við áttum fína spretti og var sérstaklega gaman að sjá baráttuna í liðinu og þriggja stiga nýting var góð eða 21/13.  Stigaskor var sem hér segir: Ari 19, Kristján 19, Chris 13 (15 fráköst og 5 varin skot), Craig 15, Gautur 6, Leó 6, Nonni 6, Jón Hrafn 6, Sævar 4, Siggi Haff 4, Hlynur 4, Simmi 1.

Seinni leikur okkar var gegn Hamri og vorum við lengi að komast í gang og duglegir strákar í Hamri báru enga virðingu fyrir okkur. Gaman er að sjá að Raggi Nat. er kominn af stað hjá Hamri en hann meiddist í haust.  Eftir mikinn klaufaskap af okkar hálfu í vörn og sókn tókum við af skarið í restina og unnum fjórða leikhluta 34-4 og tókum leikinn 76-46. Hamar er ekki kominn með sinn erlenda leikmann og einnig vantaði Svavar Pál í liðið og munar um minna. Pétur þjálfari og Lalli þjálfari Hamars leyfðu öllum að spila og er það vel því einhvern tímann verða ungu strákarnir að fá reynslu. Stigaskor var sem hér segir: Chris 21 stig (18 fráköst, 6 varin skot), Craig 19, Jón Hrafn 11, Kristján 10, Ari 10, Siggi Haff 3, Simmi 2.

Það er langt í land hjá okkur, en erum þó alveg á þeim stað sem Pétur Már þjálfari taldi að drengirnir væru á. Það sem hann var að reyna fá út úr þessum leikjum var að sjá hvar menn væru komnir í varnar og sóknarkerfum og var hann fljótur að kippa mönnum út af ef þeir voru ekki með sitt á hreinu og á það við með alla. Nú fer restin af æfingum fram að móti að taka frá þessum leikjum lexíu og bæta það sem betur mátti fara. Og eitt er á tæru. Það verða engin frí gefin.

Það sem best var við þessa ferð var að sjá hve góður liðsandi er í hópnum og það er aldrei sjálfgefið. Í lokinn viljum við þakka Borgnesingum og Hvergeringum fyrir góðar móttökur og gestrisni. Og kærar þakkir til drengjanna að leggja á sig þessa erfiður ferð.

Meistaraflokkur karla á leið suður

KFÍ drengirnir að plana átök vetrarins

Meistaraflokkur karla er á suðurleið og mun spila tvo æfingaleiki. Sá fyrri er gegn Borgarnesi í kvöld 23. sept. og hefst kl. 19.00. Sá síðari er gegn Hamar í Hveragerði og er á morgun 24. sept. og hefst kl. 13.00.

Við skorum á sem flesta aðfutta Vestfirðinga að koma og sjá drengina okkar. Núna er undirbúningur á fullu og er þetta liður í að sjá hvar við stöndum í ferlinu. 

Nú fer að koma að byrjun móts en aðeins eru þrjár vikur eru í mót og er spenna í öllum flokkum, en Pétur Már er með 9. flokka í mótum vetrarins og verður því nóg að gera hjá KFÍ.

Skráning í yngri flokka

Nú er bara að skrá sig

Í samstarfi við HSV hefur KFÍ tekið upp Nori skráningar- og greiðslukerfi.  Kerfið heldur utan um upplýsingar um iðkendur og foreldra.  Foreldrar skrá börn sín á námskeið og ganga frá æfingagjöldum um leið.

Tvær fyrrum landsliðskonur í meistaraflokk kvenna KFÍ

Sólveig og Svandís eru hér við undirskriftina ásamt formanni KFÍ Sævari Óskarsyni, Pétri þjálfara og hluta af mfl. kvenna

Þær Sólveig Helga Gunnlaugsdóttir og Svandís Anna Sigurðardóttir skrifuðu undir samning við KFÍ og munu spila með meistaraflokk kvenna í vetur. Þetta mun styrkja liðið mjög enda hér á ferðinni tvær mjög leikreyndar stúlkur sem til samans eiga að baki 31 leik með landsliðinu.  

Sólveig spilaði hér á árum áður með KFÍ, en hefur einnig spilað með KR, Stjörnunni og Grindavík. Svandís hefur spilað með ÍS, Stjörnunni og KR og eru báðar stúlkurnar boðnar hjartanlega velkomnar í KFÍ.

KFÍ TV ætlar sér stóra hluti í vetur

Og við erum í loftinu

Nú eru drengirnir í KFÍ TV að gíra sig upp fyrir veturinn og eru búnir að endurnýja búnað sinn. Ennfremur er ljósleiðaratenging að komast á og þá verða gæði útsendingar í hæstu gæðum. Það er mikil tilhlökkun í hópnum sem telur fimm manns og verið er að leggja lokahönd á frágang og er ætlun okkar einnig að gera okkur góða aðstöðu á Jakanum, en aðstaðan er slæm eins og er. En nú stendur til að laga það.

Við viljum einnig koma skilaboðum til aðkomuliða og dómara að taka með sér minnislykil. Við tökum þá fyrir leik og setjum leikina inn á fyrir þá.

Körfuboltahátíð KFÍ 1. október

Svona byrjar ballið. Mynd Helgi Sigmundsson

Á fundi unglingaráðs s.l. mánudag var ákveðið að setja aftur upp körfuboltahátíð KFÍ, en sú hátíð tókst með eindæmum vel í fyrra og mættu um 250 manns. Þar var margt til gamans gert og voru meðal annars allir úr meistaraflokkum félagsins á staðnum og leikir og annað skemmtilegt á dagskrá. Þar verður 3 stiga keppni, "stinger" og margt fleira.

Það verður ekki síðra núna og er nefnd að störfum núna sem ætlar að gera þennan dag fjölskyduvænan og eru allir Vestfirðingar velkomnir. Nánar verður gert grein fyrir dagskránni þegar líður á september, en um að gera að hringa á dagatalið hjá sér strax 1. október kl. 11-13 í íþróttahúsinu á Torfnesi (Jakanum)

Níu flokkar á mót í vetur

Stelpurnar verða í eldlínunni í vetur

Á keppnistímabilinu sem senn hefst hjá körfuboltanum hjá KKÍ mun KFÍ senda níu flokka á mót. Þetta eru frábærar fréttir og er mikil tilhlökkun hjá félaginu.

Á fundi sem haldin var á mánudagskvöldið s.l. var ráðist í skipulagningu vetrarins með unglingaráði og þjálfurum félagsins. Þar var ákveðið að taka þátt í mótum á vegum KKÍ en um er að ræða bikarkeppni og Íslandsmót ásamt föstum helgarmótum á vegum félaga fyrir sunnan s.s. Nettómótið og Póstmótið.

Einnig var ákveðið að stefna að keppni í Vestfjarðamóti og er undirbúningur þess á fullu fyrir yngri flokkana.

Nánar verður skýrt frá þessu þegar dagskrá er klár frá KKí og munum við setja þetta á síðuna um leið og við fáum frekari upplýsingar.

Ný æfingatafla kominn inn

Vegna mannlegra mistaka kom ekki rétt æfingatafla inn á síðuna okkar. Þetta hefur verið leiðrétt og biðjumst við velvirðingar á þessu. Við biðjum foreldra og forráðamenn um að kynna sér nýju töfluna sem er hér undir "skrár og skjöl" til vinstri á síðunni.

Það er þó jákvætt við þetta að krakkarnir geta farið beint á æfingu úr skólanum. Við vonum að þetta komi ekki til með að raska miklu hjá foreldrum og iðkendum.

Kær kv.

Stjórn KFÍ

Krílaboltinn hefst í dag

Það var gaman í fyrra

Loksins eru litlu krílin að byrja hjá KFÍ. Þessi hópur var mjög vinsæll í fyrra og var vel mætt.

Núna er þetta að byrja aftur og mun Kristján Pétur Andrésson sjá um æfingarnar.  Við mælum með að foreldrar sendi krakkana sína í dag og leyfi þeim að pústa og leika sér.  Krílaboltinn er gjaldfrjáls og því ætti kostnaðurinn ekki að vefjast fyrir neinum. 

Vonumst við til að sjá sem flesta. 

Æfingin er frá 16.00-16.50 á miðvikudögum og eru æfingarnar í íþróttahúsinu við Austurveg.

Pétur Már á leið til Kína

Pétur á leið til Kína

Okkar ástsæli þjálfari Pétrur Már Sigurðsson er að leggja í mikið ferðalag með íslenska landsliði karla til Kína sem mun leika þar í boði heimamanna. Kinverjarnir buðu KKÍ að senda landslið okkar þangað til að spila æfingaleiki og borga allan kostnað við ferðina sem mun taka viku. Pétur er aðstoðarþjálfari landsliðs KKÍ og er þetta einstakt tækifæri á að sjá þetta stórbrotna land. Það má áætla að ferðalagið þangað og til baka taki um 64 tíma. Þess má geta að Ísfirðingurinn Sigurður Gunnar Þorsteinsson er í liðinu þannig að Ísfirðingar eiga smá í landsliðinu.

Við sendum Pétri góðar ferðakveðjur og segjum áfram Ísland.