Frábær ferð á Nettómótið í Reykjanesbæ

Yngsti hópurinn í stuði enda rosa gaman á Nettómóti.

Stelpurnar kepptu sem tvö lið á Nettómótinu.

Yngri strákarnir áttu góða spretti og sýndu miklar framfarir.

Strákarnir í elsta hópnum gerðu góða ferð á Nettómótið.

1 af 4

Um 35 keppendur á vegum KFÍ mættu á Nettómótið í Reykjanesbæ um helgina. Alls taldi hópurinn yfir 50 manns með keppendum, þjálfurum, fararstjórum og foreldrum. Gist var í Holtaskóla í Keflavík og þétt og skemmtileg dagskrá alla helgina þar sem um 1200 börn kepptu í körfubolta en einnig var boðið upp á bíó, hoppukastala og Vatnaland auk glæsilegrar kvöldvöku á laugardagskvöldinu. KFÍ var með fimm lið í mótinu sem öll stóðu sig mjög vel og var gaman að sjá framfarirnar hjá krökkunum eftir veturinn. Það er líka gaman að segja frá því að þau voru öll til mikillar fyrirmyndar og er félagið afskaplega stolt af þeim.

Líkt og í fyrra varð hópurinn af lokahátíð mótsins á sunnudeginum þar sem ákveðið var að flýta brottför vegna tvísýns veðurútlits. Þegar á Hólmavík var komið var ljóst að Steingrímsfjarðarheiði yrði ekki opnuð þann daginn og varð hópurinn að gista á Hólmavík. Það kom þó ekki að sök því gert hafði verið ráð fyrir að slíkt gæti gerst og búið að ganga frá gistingu fyrir hópinn. Krakkarnir gistu í íþróttahúsinu á Hólmavík og það fór mjög vel um þau enda vel útbúin fyrir slíka dvöl. Vill KFÍ nota tækifærið og þakka sérstaklega Hrefnu hjá Kaupfélagi Steingrímsfjarðar sem og öllu starfsfólki kaupfélagsins og íþróttahússins fyrir ómetanlega aðstoð og velvilja. 

Háspenna á Jakanum

Mynd: Halldór Sveinbjörnsson

KFÍ-ÍR á morgun föstudag

Á morgun 28.febrúar koma silfurdrengir Örvars Þórs frá því um síðustu helgi í Powerade bikarnum í heimsókn á Jakann. Þeir eiga harma að hefna, en KFÍ tók leikinn fyrir sunnan 76-86. Margt hefur breyst hjá báðum liðum og hafa ÍR drengirnir staðið sig svo sannarlega eftir áramót og hafa fengið hinn frábæra Nigel Moore frá Njarðvík og aðrir ens og Matti Sig, Hjalti, Sveinbjörn og Björgvin hafa spialð frábærlega.

ÍR er að berjast fyrir góðu sæti í úrslitakeppninni á meðan við erum að berjast fyrir sæti í Dominosdeildinni. Það er engan bilbug á drengjunum úr KFÍ að finna og þeir eru svo sannarlega tilbúnir í leik. Núna verðum við að fá sem flesta á Jakann og öskra frá sér allt vit.

Að venju byrjum við á því að fá okkur í gogginn með kokkaliði KFÍ og er eldað á hinni frábæru Muurikka pönnu sem meistari Steini er með á sínum snærum.

KFÍ-TV verður að sjálfsögðu með beina útsendingu og hefst hún kl.18.50.

Áfram KFÍ

Myndarlegur hópur frá KFÍ á leið á Nettó-mótið

Hluti af þessum vaska hóp er á leið á Nettó en Birgir Örn, þjálfari meistaraflokks KFÍ fær þó ekki að koma með. Ljósm. Halldór Sveinbjörnsson.

Hið árlega Nettó-mót í körfubolta fer fram í Reykjanesbæ um helgina en mótið er ætlað börnum sem fædd eru 2002 eða síðar. Körfuknattleiksfélag Ísafjarðar hefur sótt mótið mörg undanfarin ár og sendir nú til keppni einn af sínum stærstu hópum frá upphafi. Hópurinn er í óðaönn að undirbúa ferðina en alls eru fimm lið frá KFÍ skráð til leiks, samtals 34 börn á aldrinum 5-11 ára. Með þeim til halds og trausts fara tíu liðs- og fararstjórar og fimm þjálfarar og verða því um fimmtíu manns á vegum KFÍ á mótinu um helgina, fyrir utan ættingja og vini á höfuðborgarsvæðinu sem munu án efa koma og hvetja krakkana til dáða í leikjunum. Einstaklega fjölbreytt dagskrá hefur alla tíð einkennt mótið og allt skipulag er til fyrirmyndar. Engin stig eru talin og allir fara heim með verðlaunapening að móti loknu á sunnudag.

Nettó-mótið er samstarfsverkefni barna- og unglingaráða körfuknattleiksdeilda Keflavíkur og Njarðvíkur og er nú haldið í 24. sinn. Mótið er hið stærsta sinnar tegundar á landinu og tóku ríflega 1.200 keppendur þátt í því í fyrra allsstaðar að af landinu. Enn fleiri lið eru skráð til keppni í ár og stefnir því í metþátttöku. 

Hér eru upplýsingar um NETTÓ mótið 1-2.mars

7. flokkur í fjölliðamóti

Eins og komið hefur fram í fjölmiðlum (BB) þá var 7. flokkurinn okkar í fjölliðamóti syðra um síðustu helgi.  Stóðu strákarnir sig mjög vel og unnu 3 leiki og töpuðu einum naumlega. 

Leikur #1  KFÍ-Álftanes  31-12

Auðveldur sigur í fyrsta leik.  Álftnesingar styttra komnir í íþróttinni og sást um tíma ansi mikill munur, lokatölur 31-12 og drengirnir okkar að spila vel.

Stigin:

Egill Fjölnisson 12

Hilmir Hallgrímsson 7

Blessed Gil Parilla 6

Daníel Wale 4

Hugi Hallgrímsson 2

Þorleifur Ingólfsson, Gísli Steinn Njálsson, Guðni Rafn Róbertsson, Michal Glodkowski, Ólafur Ernir Bjarkason skoruðu ekki að þessu sinni en léku vel.

Leikur #2  KFÍ-Tindastóll 30-33

Hörkuleikur sem reyndist úrslitaleikur mótsins því bæði lið unnu aðra leiki sína.  KFÍ kemst í 6-0, þá koma norðanmenn með áhlaup og breyta stöðunni í 6-7 og síðan 10-18 í hálfleik.  Við reynum hvað við getum að minnka muninn og þegar rúm mínúta var eftir minnkum við muninn í eitt stig 30-31 en Tindastóll klárar þetta með tveimur vítum og lokatölur 30-33.  Hörkuleikur og naumt tap.

Stigin:

Hilmir 11

Gísli 7

Daníel 6

Egill 4

Hugi 2

Leikur #3  KFÍ-Breiðablik 21-10

Fyrri hálfleikur var nokkuð jafn og staðn í hálfleik 11-7 fyrir okkur.  KFÍ piltar koma svo mjög ákveðnir í þriðja leikhluta og breyta stöðunni í 19-7 og björninn unninn.  Lokatölur síðan 21-10, öruggur sigur.

Stigin:

Hilmir 8

Daníel 7

Gísli 6

Leikur #4  KFÍ - ÍR 28-20

Lokaleikurinn við heimamen í ÍR.  Hörkuleikur sem þróaðist svipað og Blikaleikurinn.  Leikur í járnum fram í hálfleik, hálfleiksstaðan 12-11.  Við tökum öll völd í þriðja leikhluta og breytum stöðu í 21-11.  Lokatölur svo 28-20.

Stigin:

Daníel 8

Hilmir 7

Egill 5

Blessed 4

Hugi 4

Heilt yfir mjög gott mót hjá okkar strákum, hársbreidd frá því að vinna riðilinn og færast þá upp í c-riðil.  Strákar voru allir að spila og berjast vel og framfarir greinilegar undir styrkri stjórn Mirko þjálfara.

Nánari úrslit úr mótinu má finna hér.

Haukarnir héldu út og flugu burt með tvö stig

Mynd: Halldór Sveinbjörnsson / BB.is

Stórleikur á Jakanum á föstudagskvöld

Það verður hörkuleikur í boði á föstudagskvöldið 14.febrúar þegar strákarnir úr Haukum koma á Jakann. Fyrri leikur okkar gegn þeim fór 73-67 í Hafnarfirði og var hörkuleikur þar sem við klúrðuðum fjórða leikhluta illa. Það er tilhlökkun í hópnum okkar sem fengu skell í síðasta leik gegn Grindavík og ætla að sýna tennurnar.

Það verður enginn svikinn af því að koma á Jakann. Við byrjum á að kveikja undir Muurikka pönnunni hjá meistara Steina sem er galdramaður að mennt þegar kemur að matreiðslu og hefst sú veisla kl.18.30 stundvíslega. Nú þegar fólk hefur borðað sinn Ísborgara þá er það kaffi "a la Unglingaráð" og svo leikur kl.19.15. Ekki dónalegt það.

Þeir sem eru utan svæðis og komast ekki á leikinn fá allt beint í auga frá drengjunum úr KFÍ-TV og byrja þeir útsendingu kl.18.50.

Áfram KFÍ

HORFT TIL FRAMTÍÐAR

Næsta laugardag, 15. febrúar kl. 10.30-14.00, efnir barna- og unglingaráð KFÍ til stefnumótunarfundar í Menntaskólanum á Ísafirði þar sem horft verður til framtíðar í yngri flokka starfi félagsins með það að markmiði að ná fram auknum gæðum í uppbyggingu og starfssemi. Gestur fundarins verður Ívar Ásgrímsson, íþróttastjóri Hauka, sem mun flytja erindi um ýmsa þætti yngri flokka starfsins, t.d. hvað þarf til að ná fram fjölgun og árangri, hæfni þjálfara og tengingu íþrótta við skólastarf. Ívar sér um faglegt starf fyrir allar deildir Hauka og er jafnframt þjálfari meistaraflokks karla í körfubolta og yfirþjálfari yngri flokka félagsins.

Þegar Ívar hefur lokið máli sínu verður boðið upp á súpu og brauð en því næst hefst vinna við endurskoðun á Handbók KFÍ frá árinu 2005 en um er að ræða stefnumótun sem var unnin þegar félagið varð fyrirmyndarfélag ÍSÍ. Í formála hennar segir: „Handbók þessi inniheldur stefnu Unglingaráðs Körfuknattleiksfélags Ísafjarðar, unnin skv. verkefni ÍSÍ um fyrirmyndarfélag/-deild. Er þetta fyrsta handbókin sem lítur dagsins ljós og verður hún í stöðugri endurnýjun.“ Er það hlutverk fundarins að endurnýja handbókina og marka stefnuna til næstu ára. Handbókina má finna inni á vefsíðu KFÍ http://kfi.is/skrar_og_skjol/skra/184/  og http://kfi.is/skrar_og_skjol/skra/185/)

Við hvetjum alla þá sem áhuga hafa á starfi yngri flokka KFÍ til að mæta á fundinn á laugardaginn og taka þátt í að móta framtíðarstefnu félagsins. Alltaf er rétt að staldra við og skoða hvort haldið sé í rétta átt, hvað er verið að gera vel og hvað má betur fara.

Dagskrá:

Kl. 10.30     Birna Lárusdóttir, formaður barna- og unglingaráðs KFÍ, setur fundinn.

Kl. 10.40     Erindi: Ívar Ásgrímsson, íþróttastjóri Hauka

Kl. 11.40     Fyrirspurnir og umræður

Kl. 12.00     Hádegismatur

Kl. 12.30     Stefnumótunarvinna, endurskoðun Handbókar KFÍ frá 2005

Kl. 13.30     Samantekt og niðurstöður

Kl. 14.00     Fundarlok

Stór helgi hjá KFÍ

7. flokkur að fara yfir málin.

Mikið verður um að vera hjá hinum ýmsu flokkum KFÍ núna um helgina.

Fyrstir á sviðið fara meistaraflokksstrákarnir okkar og leika við KR í Vesturbænum í kvöld föstudag.  Á sunnudag fara þeir síðan til Grindavíkur að spila við Sigga Þorsteins og félaga.

7. flokkurinn okkar tekur þátt í fjölliðamóti í ÍR hellinum (Seljaskóla) og spila á laugardag og sunnudag, fyrsti leikur kl. 15.00,alla dagskrá mótsins má sjá hér.

Drengjaflokkurinn fer æfingaferð suður og spilar æfingaleik við ÍR kl. 11.30 einnig í Seljaskóla og svo við Breiðablik kl. 15.00.

Svo er Linda okkar Kristjáns að spila með Breiðabliki um helgina, hún æfir hér westra en spilar með Breiðabliki þar sem ekki eru nógu margar að æfa á hennar aldri.  Eru þær að spila gegn Hamar/KR.  Leikurinn fram  fram á laugardag kl. 15.00 í Hveragerði.

Hvetjum alla sem vettlingi geta valdið að kíkja á okkar flottu iðkendur og hvetja til sigurs.

Sævar lætur af formennsku í KFÍ

Sævar Óskarsson og Óðinn Gestsson.

Á fundi stjórnar KFÍ sem haldinn var í gær lét Sævar Óskarsson af störfum sem formaður félagsins en hann hefur setið í stjórn frá árinu 2005, þar af gegnt starfi formanns frá árinu 2010. Af þessu tilefni hefur Sævar sent frá sér eftirfarandi yfirlýsingu:

„Kæru KFÍ félagar.

Enginn ræður sínum næturstað og er staðan hjá fjölskyldu minni nú þannig að mér er nauðsynlegt að einbeita mér að verkefni henni tengdri. Ljóst er að ég verð erlendis þegar síðustu leikir meistaraflokks fara fram á þessum vetri og ekki til taks við uppgjör og lok tímabilsins. Ég hef því ákveðið að víkja sem stjórnarmaður og formaður félagsins þannig að hagsmunir þess skaðist ekki með fjarveru stjórnarmanns. Félagið er ríkt af metnaðarfullu hæfileikafólki sem er tilbúið að vinna að hagsmunum KFÍ og maður kemur í manns stað - það gerir svona ákvörðun léttbærari. Ég vil þakka ykkur öllum; leikmönnum, iðkendum, þjálfurum, foreldrum, stuðningsmönnum og stjórnarfólki fyrir farsælt samstarf á formannsferli mínum. Ég verð áfram í bakvarðasveit félagsins og mun styðja það með ráðum og dáð, hér eftir sem hingað til.

Áfram KFÍ!"

Á stjórnarfundinum var Óðinn Gestsson kosinn til að leiða starf stjórnar og félagsins til næsta aðalfundar. Magnús Þór Heimisson kemur nú inn sem aðalmaður í stjórn.

Stjórn KFÍ færir Sævari bestu þakkir fyrir mikið og óeigingjarnt starf í þágu félagsins til margra ára. Einnig fylgja velfarnaðaróskir til þeirra hjóna en Margrét, eiginkona Sævars, heldur brátt til Bandaríkjanna til lækninga.