Nebojsa Knezevic á leið heim til KFÍ

Nebojsa Knezevic, sem lék hér með okkur í úrvalsdeildinni veturinn 2010-2011, er á leið til okkar á ný og væntum við að hann verði klár fyrir tímabilið í 1.deild sem hefst í október.

Nebo, eins og hann er nefndur hér heim, var með 15 stig og 5 fráköst í leik og var frábær bæði innan sem utan vallar. Skoraði hann mest 27 stig í einum leik og tók mest 13 fráköst. Það er mikil gleði að fá þennan geðuga pilt til baka.

Þess má geta að mfl.karla hefur leik núna á laugardag þegar þeir taka á móti firnasterku liði Tindastóls í Lengjubikarnum. Er leikurinn settur á kl.17.00 á laugardaginn 13.september og er að sjálfsögðu á Jakanum.

Áfram KFÍ

Æfingataflan klár

Þessi klár í slaginn

Þá er vetrarstarfið farið á fullt og æfingataflan tilbúin.

Hana er að finna hér eða undir skrár og skjöl hér til hliðar.

Körfuboltadagurinn á morgun

Vetrarstarf yngri flokka KFÍ hefst á morgun með hinum árlega Körfuboltadegi  á Torfnesi þar sem þjálfarar og æfingatafla vetrarins verða kynnt og krakkar á öllum aldri fá að spreyta sig með körfubolta í léttum æfingum og leikjum undir stjórn meistaraflokka félagsins. Fjörið stendur frá 11-13. Holl og góð hressing í boði og heitt á könnunni fyrir foreldra og forráðamenn.

ALLIR VELKOMNIR!

Styttist í vetraræfingar yngri flokka

Frá Körfuboltadeginum í fyrra.

Vetrarstarf KFÍ er nú í fullum undirbúningi og tekur ný æfingatafla allra flokka gildi mánudaginn 8. september. Þar sem vinna við tímaúthlutun í íþróttahúsum Ísafjarðarbæjar stendur enn yfir á vegum HSV tefst frágangur æfingatöflu KFÍ sem því nemur. Taflan verður birt hér á heimasíðunni um leið og hún liggur fyrir.

Við hefjum veturinn með látum laugardaginn 6. september en þá verður Körfuboltadagurinn haldinn með stæl í íþróttahúsinu Torfnesi. Við segjum nánar frá dagskrá hans þegar nær dregur en leggjum til að allir áhugasamir taki daginn frá milli kl. 11-14. Markmiðið með Körfuboltadeginum er að kynna körfuna fyrir ungum jafnt sem öldnum og marka um leið formlegt upphaf vetrarstarfs yngri flokka KFÍ.

Hlökkum til að sjá sem allra flesta í körfu í vetur!

Birgir Björn kominn heim

Birgir og Shiran kampakátir við undirritun samningsins

Þau gleðitíðindi voru að berast að Birgir Björn Pétursson okkar hafi ákveðið að koma aftur heim.

Fyrr í dag var ritað undir samkomulag til tveggja ára.  Birgir snýr nú á heimaslóðir til að byggja upp lið KFÍ.  Hann byrjaði að æfa ungur að aldri hjá KFÍ og er það minnistætt þegar fyrrum aðalþjálfari liðsins Tony Garbolotto sagðist sjá í Birgi öflugan leikmann sem gæti orðið lykilleikmaður liðsins.  Það má því segja að hann hafi verið sannspár því nú er sú stund runninn upp. 

Birgir mun verða lykilmaður í að leiða liðið á komandi tímabilum.  KFÍ vill vera í keppni með hinna bestu og mun Birgir gegna veigamiklu hlutverki í þeirri baráttu.

Birgir hefur átt afbragðsferil og var lykilleikmaður Valsliðsins á síðastliðnum árum.  Hann hefur vaxið á hverju ári og er nú í æfingahópi íslenska landsliðsins í körfuknattleik.  Birgir er jafnframt íþróttafræðingur og mun koma að þjálfun yngri leikmanna.

Frekari frétta af leikmannamálum félagsins má vænta á næstu dögum og vikum.

Sumaræfingar yngri flokka að hefjast

Á morgun, þriðjudaginn 1. júlí, hefjast sumaræfingar yngri flokka KFÍ og eru þær ætlaðar krökkum fæddir 2003 og eldri. Æft verður í íþróttahúsinu á Torfnesi tvisvar í viku, á þriðjudögum og fimmtudögum, kl. 17. Það er enginn annar en Birgir Örn Birgisson, þjálfari meistaraflokks karla, sem heldur utan um æfingar sumarsins og því eiga krakkarnir von á flottum og uppbyggilegum æfingum sem halda þeim við efnið fram að því að vetrardagskrá KFÍ hefst í september. Barna- og unglingaráð KFÍ væntir þess að iðkendur félagsins nýti þetta tækifæri vel til að halda sér í formi og hvetur einnig áhugasama krakka, sem vilja spreyta sig í körfunni, til að kíkja á æfingarnar. Æfingagjaldinu er stillt mjög í hóf og verður innheimt í lok sumars þegar fyrir liggur hve margar æfingar hver og einn hefur getað nýtt sér.

Ný karfa og boltar í boði KFÍ og Vestfirskra verktaka

Hressir krakkar á Eyrarsól undir nýju körfunni frá KFÍ

Krakkarnir á leikskóladeildinni Eyrarsól við Austurveg á Ísafirði geta nú æft sig af kappi í körfubolta því Körfuknattleiksfélag Ísafjarðar í samstarfi við Vestfirska verktaka hefur sett upp veglega körfu á leiksvæði krakkanna. Karfan ásamt nokkrum boltum er gjöf frá barna- og unglingaráði KFÍ en Vestfirskir verktakar gáfu efni og vinnu við uppsetningu til að verkefnið yrði að veruleika. KFÍ þakkar Vestfirskum kærlega fyrir stuðninginn og aðstoðina.

Leiksvæðið, sem er á Austurvegi milli Sundhallarinnar og Grunnskólans á Ísafirði, er sameiginlegt fyrir yngsta stigið í skólanum og Dægradvöl og því munu krakkar á aldrinum 5-9 ára njóta góðs af þessari ágætu viðbót við svæðið en staðsetningin var valin í samráði við GÍ. Lítill sparkvöllur er á svæðinu ásamt nokkrum leiktækjum og þótti forsvarsmönnum KFÍ þörf á að auka við boltaflóruna hjá yngsta aldurshópnum. Frekari framkvæmdir eru framundan við skólalóð GÍ og væntir KFÍ þess að vel verði hugað að bættri aðstöðu fyrir boltagreinarnar, ekki síst körfuboltann. Meðfylgjandi mynd var tekin á föstudag þegar KFÍ afhenti hressu krökkunum á Eyrarsól og starfsfólki deildarinnar körfuna formlega til eignar ásamt nokkrum körfuboltum.

Sumarfjarnám í þjálfaramenntun

ÍSÍ býður upp á sumarfjarnám í þjálfaramenntun eins og mörg undanfarin ár.  Að þessu sinni verður nám á öllum þremur stigunum í boði, 1. 2. og 3. stigi almenns hluta.  Námið hefur verið afar vinsælt undanfarin ár og með auknum áherslum á fagþekkingu og fagleg vinnubrögð íþróttaþjálfara í hvívetna eykst þörfin á náminu enn frekar.

Allar frekari uppl. um þjálfaramenntun ÍSÍ gefur Viðar Sigurjónsson í síma 460-1467 & 863-1399 og/eða á vidar@isi.is

Allt á fleygiferð í Körfuboltabúðum KFÍ

Rífandi gangur er í Körfuboltabúðum KFÍ en þær voru formlega settar á þriðjudagseftirmiðdag og er þetta sjötta árið í röð sem búðirnar fara fram.  Alls taka 90 krakkar á aldrinum 10-18 ára frá  átta félögum víðsvegar um land þátt í búðunum og hefur fjöldi iðkenda sjaldan verið meiri. Góður hópur foreldra og fararstjóra fylgir krökkunum og allir hjálpast að við að gera búðirnar sem best úr garði. Heimavist Menntaskólans á Ísafirði er fullskipuð og mikið gengur á í mötuneyti skólans þar sem þær Lúlú og Ella ráða ríkjum enda þarf mikinn mat ofan í krakka sem æfa fjórum sinnum á dag.

Gærdagurinn gekk eins og í sögu en Finnur Freyr Stefánsson, yfirþjálfari, gerði nokkrar breytingar á dagskránni frá því í fyrra og hafa þær mælst vel fyrir. Í gær hlýddu krakkarnir á fyrirlestur hjá Helenu Sverrisdóttur, landsliðskonu og atvinnumanni í körfubolta en hún er einn af aðalþjálfurum búðanna. Í dag skellti hópurinn sér út í góða veðrið í jógatíma hjá Gunnhildi Gestsdóttur, jógakennara á Ísafirði.

Veðrið leikur við iðkendur, þjálfara og gesti búðanna og spáin lofar góðu. Búðunum lýkur formlega kl. 15 á sunnudag, hvítasunnudag. Hægt er að fylgjast með gangi búðanna og sjá ógrynni af myndum á facebook "Körfuboltabúðir KFÍ". 

Kjartan Helgi Steinþórsson í KFÍ

Kjartan Helgi Steinþórsson kominn í KFÍ

Í dag var skrifað undir samning við Kjartan Helga Steinþórsson úr Grindavík. Það var gert fyrir sunnan og var Birgir Örn þjálfari þar og kláraði málin. Kjartan er nítjan ára gamall 193 cm á hæð og er leikstjórnandi/skotbakvörður og  kemur frá Grindavík. Hann fór til BNA til að spila körfu og til náms árið 2011 og spilaði með gríðarlega sterku liði Warren Hardin skólanum sem sigraði í sínum riðli í 1.deildinni og komust í átta liða úrslit. Hann var þar sem skiptinemi og vegna reglna í High School sem eru úti gat hann ekki haldið áfram í skólanum þar og fluttist hann í Hamton Roads Academy í Virginíu og var þar einn af burðarásum liðsins og var ofarlega i allri tölfræðinni. Þaðan hélt hann til 2. deildar háskólann Southwest Baptist í NCAA  en þessi skóli var einum of mikill í trúfræðinni og ekki í boði að vera þar í þrjú ár. Hann hélt því til uppeldisfélags hans Grindavík og var þar í vetur. Kjartan er í U-20 landliðshópnum ásamt Jóa okkar.

Það eru góðar fréttir að ungu krakkanir séu farnir að líta til KFÍ þar sem stjórn og þjálfarinn okkar Birgir Örn ætla sér stóra hluti. Núna eru tveir ungir leikmenn búnir að skrifa undir og er von á frekari fréttir á næstu dögum.

Áfram KFÍ