Félgasfundur KFÍ um sameiningu íþróttafélaga

Stjórn Körfuknattleiksfélags Ísafjarðar boðar til félagsfundar (aukafundar) vegna fyrirhugaðrar sameiningar íþróttafélaga á norðanverðum Vestfjörðum. Fundurinn fer fram á fimmtudaginn 18. desember kl. 18:00 í húsnæði Sjálfstæðisflokksins á Ísafirði að Aðalstræti 20.

Dagskrá:

1. Kynning á vinnu undirbúningshóps sameiningar
2. Umræður
3. Kosning tveggja fulltrúa í sameiningarnefnd

Allir þeir sem koma að starfsemi KFÍ, jafnt iðkendur sem sjálfboðaliðar, foreldrar iðkenda og fylgismenn eru hvattir til að mæta á fundinn.

Boðað er til fundarins samkvæmt 9. gr. laga KFÍ um aukafund: „Aukafund félagsins má halda ef stjórn álítur þess þörf eða ef 2/3 hlutar atkvæðisbærra fundarmanna á aðalfundi félagsins óska eftir því, enda tilkynni þeir um leið það fundarefni er ræða á. Aukafundur er lögmætur ef til hans er boðað með helmingi styttri tilkynningarfresti en mælt er fyrir um í 6. gr. Um atkvæðisrétt og kjörgengi á aukafundi fer eftir 8. gr. Á aukafundi má ekki gera lagabreytingar.“

Um atkvæðisrétt og kjörgengi á aukafundi fer samkvæmt 8. gr. laga félagsins: „Rétt til setu á aðalfundi með málfrelsi, tillögurétt og atkvæðisrétt eiga allir félagsmenn. Rétt til kjörgengis í stjórn eiga þeir félagar sem eru orðnir 18 ára.“

Stelpurnar mæta Fjölni á sunnudagur

Stelpurnar berjast um þriðja sæti deildarinnar á sunnudaginn.

Kvennalið KFÍ hefur verið á mikill siglingu undanfarið en liðið hefur unnið tvo síðustu leiki sína. Á sunnudaginn kemur, þann 14. desember kl. 14:00, mæta stelpurnar Fjölni hér heima. Bæði lið hafa unnið tvo leiki og sitja því jöfn að stigum í 3.-5 sæti deildarinnar ásamt Tindastóli. Því má segja að leikurinn á sunnudag sé í raun barátta um þriðja sætið en það lið sem sigrar á sunnudaginn á góðan möguleika á að komast í 3. sæti deildarinnar nema að Tindastóll sigri sinn leik og endi með hagstæðari stigahlutfall eftir hann.

Sem fyrr segir hefst leikurinn kl. 14:00 á Tornfesi. Allir að mæta og hvetja stelpurnar áfram á sigurbraut!

Þess má einnig geta að karlalið KFÍ mætir Hetti á Egilsstöðum föstudaginn 12. desember og verður spennandi að sjá hverning sá leikur fer en okkar menn töpuðu naumt í tveimur heimaleikjum gegn Hetti í haust og hafa þeir því harma að hefna.

Glæsilegur sigur gegn FSu/Hrunamönnum

Eva Margrét Kristjánsdóttir átti góðan leik í dag og setti 28 stig.

Kvennalið KFÍ vann stórsigur á liði FSu/Hrunamanna í dag á Torfnesi. Þetta var öruggur sigur sem aldrei var í hættu og lauk leiknum 86-57.

Þótt gestirnir hafi verið fyrri til að skora með þriggja stiga körfu strax á annari mínútu tóku KFÍ stelpur í kjölfarið völdin í sínar hendur með góðum 12-0 kafla. Þegar fyrsta leikhluta lauk var staðan 23-11 KFÍ stelpum í vil. Gestirnir náðu að klóra nokkuð í bakkann byrjun annars fjórðungs og minnkuðu muninn í 25-17 einkum með góðri baráttu sem skilaði sóknarfráköstum og stigum í kjölfarið. KFÍ stelpurnar voru þó ekki á því að hleypa þeim sunnlensku inn í leikinn og settu aftur í fluggír með stolnum boltum og góðum þriggja stiga körfum. Í hálfleik var staðan því 47-28. Í þriðja fjórðungi héldu KFÍ stelpur uppteknum hætti og náðu að spila sinn leik þótt Labrenthia þjálfari hvíldi lykilleikmenn, þ.e. sig sjálfa og Evu Margréti. Það var sérstaklega ánægulegt að sjá reynsluminni leikmenn stiga upp og spila yfirvegaðan og góðan leik án lykilleikmannanna tveggja. Í loka fjórðungnum var aldrei hætta á að forskotið minnkaði og var glæsilegur sigur því staðreynd þegar flautað var til leiksloka 86-57. Góður leikur hjá stelpunum þar sem allir leikmenn lögðu sitt af mörkum.

Labrenthia Murdock Pearson, spilandi þjálfari KFÍ, var stigahæst með 31 sti, 7 fráköst og 7 stolna bolta. Eva Margrét átti einnig góðan leik með 28 stig, 9 fráköst og 4 stolna bolta. Alexandra Sif Herleifsdóttir var öflug inn í teygnum, setti 8 stig og tók 10 fráköst. Linda Marín Kristjánsdóttir setti einnig 8 stig og tók 2 fráköst. Reynsluboltinn Anna Soffía Sigurlaugsdóttir átti mjög góða innkomu skoraði 7 stig, tók 2 fráköst, stal boltanum 2 og gaf 2 stoðsendingar. Rósa Överby skoraði 2 stig, tók 4 fráköst, stal 2 boltum og gaf 2 stoðsendingar. Hekla Hallgrímsdóttir skoraði 2 stig og Saga Ólafsdóttir tók 5 fráköst.

Hjá gestunum var Nína Jenný Kristjánsdóttir stigahæst með 15 stig, Þórdís Jóna Kristjánsdóttir skoraði 13 stig og Ragnheiður Björk Einarsdóttir 11. Margrét Hrund Arnarsdóttir og Karen Munda Jónsdóttir 8 stig hvor og Hrafnhildur Magnúsdóttir 2.

Ítarlega tölfræði leiksins má nálgast á heimasíðu KKÍ.

Næsti leikur kvennaliðs KFÍ er heimaleikur gegn Fjölni sem fer fram sunnudaginn 14. desember kl. 14:00.

Stelpurnar mæta FSu á sunnudag

Stelpurnar mæta FSu/Hrunamönnum á sunnudaginn.

Kvennalið KFÍ mætir liðið FSu/Hrunamanna í 1. deild kvenna á sunnudaginn 7. desember hér heima klukkan 14:00. Það hefur verið stígandi í leik stelpnanna frá frysta leik og mikilar framfarir í gangi. Stelpurnar unnu Tindastól á útivelli í síðustu umferð svo nú er um að gera að láta kné fylgja kviði og leggja gestina af Suðurlandi hér heima.

Fjölmennum á leikinn og styðjum stelpurnar!

Leikurinn verður sýndur í beinni útsendingu á KFÍ TV

Tap á Selfossi

Mynd: ingvi.stigsson.is

Birgir Björn Pétursson í baráttunni við Colin Pryor.

Hlynur og Haukur Hreinssynir.

Birgir og Pryor

1 af 4

Karlalið KFÍ reið ekki feitum hesti frá för sinni um Suðurlandsundirlendið síðustu daga. Á föstudaginn tapaðist leikur gegn Hamri í Hveragerði og í gærkvöldi tapaðist leikur gegn FSu á Selfossi en leikurinn átti upphaflega að fara fram á sunnudag en var frestað vegna veðurs.

Okkar menn byrjuðu ágætlega gegn FSu en undir lok fyrsta fjórðungs tóku Selfyssingar hresilega framúr. KFÍ liðið gafst þó ekki upp og átti góðan sprett í síðasta leikhlutanum en náði þó ekki að halda út og því var tap 101-86 staðreynd þegar flautað var til leiksloka. Nánar má fræðast um leikinn á heimasíðu FSu í ítarlegri samantekt. Einnig má nálgast ítarlegar tölfræðiupplýsingar á vef KKÍ.

Nebojsa var stigahæstur KFÍ manna með 27 stig, 4 fráköst og 6 stolna bolta. Birgir Björn var með 26 stig og 14 fráköst. Þá átti Óskar Kristjánsson sinn besta leik í vetur en hann setti 14 stig og var með 50% nýtingu í þriggja stiga skotum.

Hjá FSu var Collin Anthony Pryor atkvæðamestur með 27 stig og 18 fráköst og safnaði alls 45 framlagsstigum. Ari Gylfason, fyrrum liðsmaður KFÍ átti einnig góðan leik en hann setti 24 stig og var með góða skotnýtingu. Erlendur Ágústsson skoraði 22 stig.

Næsti leikur liðsins er útileikur gegn Hetti á Egilsstöðum þann 12. desember.

Myndasafn úr leiknum

Fjórir KFÍ leikmenn í landsliðshópum

Þau gleðilegu tíðindi bárust á föstudaginn var að fjórir leikmenn KFÍ hafa verið valdir í æfingahópa fyrir yngri landslið KKÍ fyrir árið 2015.

Hinn bráðefnilegi framherji/miðherji Haukur Rafn Jakobsson, leikmaður 9. flokks drengja KFÍ, var valinn í æfingahóp U15 liðs drengja sem Jóhannes A. Kristbjörnsson þjálfar.

Þrjár stúlkur úr hinum efnilega meistaraflokki kvenna eru svo í æfingahópum kvennalandsliðanna. Framherjinn Saga Ólafsdóttir var valin í æfingahóp U15 liðs kvenna sem er þjálfað af Helenu Sverrisdóttur og Ingvari Þór Guðjónssyni. Bakvörðurinn Linda Marín Kristjánsdóttir var valin í U16 lið kvenna sem Margrét Sturlaugsdóttir þjálfar en Linda var einmitt síðasta vetur í æfingahópi U15 liðs kvenna. Eva Margrét Kristjánsdóttir var valin í æfingahóp U18 liðsins sem Jón Guðmundsson þjálfar en Eva hefur áður bæði æft og spilað með U16 og U18 liðin auk þess sem hún hefur verið valin í æfingahóp A-landsliðsins.

Það er sannarlega gaman að eiga svona glæsilega fulltrúa KFÍ á vettvangi landsliða KKÍ. Stjórn KFÍ óskar þessum efnilegu iðkendum innilega til hamingju með árangurinn.

Tap gegn Hamri á útivelli

Mynd: ingvi.stigsson.is

Í gærkvöldi lék karlalið KFÍ við Hamar í Hveragerði. Þar sem ekki var flogið neyddust strákarnir til að keyra alla leið í Hveragerði. Aksturinn og saman klemmdar fætur hafa líklega haft sitt að segja fyrir strákana því leikurinn tapaðist 110-82.

Í liði KFÍ var Nebojsa atkvæðamestur líkt og svo oft áður í vetur en hann skoraði 26 stig. Birgir Björn skilaði sínu og skoraði 16 stig og tók 9 fráköst. Florijan átti einnig góðan dag en hann setti 11 stig og var með 100% nýtingu í skotum sínum og 75% nýtingu í vítum.

Hjá Hamri voru þeir Þorsteinn Gunnlaugsson og Julian Nelson atkvæðamestir hvor um sig með 27 stig. Snorri Þorvaldsson var með 16 og Bjarni Rúnar Lárusson með 11.

Nánari tölfræði leiksins má nálgast á vef KKÍ.

Næsti leikur KFÍ er útileikur gegn FSu á Selfossi á morgun sunnudaginn 30. nóvember.

Góður sigur gegn Tindastóli en tap gegn Þór

Hluti af æfingahóp kvennaliðsins á æfingu.

Kvennalið KFÍ lék tvo útileiki í 1. deildinni um helgina gegn liðum á norðurlandi. Stelpurnar byrjuðu á því að mæta Þór á Akureyri á laugardaginn en sennilega hefur ferðlagið norður setið í þeim því sá leikur tapaðist 61-46. Á sunnudaginn mættu þær svo Tindastól á Sauðárkróki og unnu stórsigur 46-71. Þetta er fyrsti sigur stelpnanna í deildinni og er hann sannarlega kærkominn. Það er því ljóst að stelpurnar eru í mikilli framför og hlökkum við til að sjá þær mæta FSU/Hrunamönnum þann 7. desember hér heima.

Þór - KFÍ 61-46

KFÍ stelpur áttu góða spretti í leiknum og var jafnræði með liðunum framan af. Í þriðja leikhluta lentu lykilleikmenn KFÍ í villuvandræðum. Labrenthia fór útaf með fimm villur í þriðja leikhluta og snemma í fjórða leikhluta fór Eva Margrét útaf.

Stigaskor: Eva Margrét 24 stig, Labrenthia 14 stig, Guðrún Edda 4 stig og Rósa 4 stig. Aðrar sem spiluðu en voru ekki með stig voru Linda Marín, Hekla, Hlín og Saga.

Tindastóll - KFÍ 46-71

Þetta var frábær leikur hjá stelpunum þar sem allt small saman. Þær spiluðu sem ein liðsheild og frábært að sjá hvað þær náðu vel saman. Í þessum leik voru allir leikmenn að gera góða hluti bæði í vörn og sókn sem skilaði sér í sætum sigri.

Stigaskor: Eva Margrét 29 stig, Labrenthia 23 stig, Guðrún Edda 9 stig, Saga 4 stig, Hlín 4 stig, Linda Marín 2 stig. Aðrir leikmenn sem spiluðu en náðu ekki að skora vour Hekla og Rósa.

Því miður eru upplýsingar um stigaskor og aðra tölfræði ekki tiltækar en við uppfærum þessa frétt um leið og þær berast.

Baráttusigur á Valsmönnum

Birgir Björn átti góðan leik í dag. Ljósmynd: Halldór Sveinbjörnsson.

Karlalið KFÍ fór með sigur af hólmi á Jakanum fyrr í dag gegn Valsmönnum í 1. deildinni. Þetta var kærkominn sigur á heimavelli og með honum er ísinn brotinn. Leikurinn var jafn og spennandi allan tímann en undir lokinn sýndu okkar strákar baráttu og yfirvegun sem skilaði sigri.

Líkt og svo oft áður í vetur voru okkar menn seinir í gang og Valsarar leiddu í upphafi leiks. Á fimmtu mínútu náði Nebosja að jafna leikinn með því að setja niður skot undir körfunni, fá villu að auki og klára vítið. Valsarar komust aftur yfir en KFÍ menn náðu góðum spretti og leiddu með tveimur stigum 19-17 þegar fyrsti fjórðungur var úti.

Valsarar fóru betur af stað í öðrum fjórðungi, voru fljótir að jafna og leiddu leikinn allt þar til að Florijan Jovanov kom KFÍ yfir með góðri þriggja stiga körfu á fimmtándu mínútur og kom KFÍ í 25-24. Florijan hafði komið inn á skömmu áður og hleypti miklum krafti í KFÍ liðið með baráttu og hvatningu. Birgir Björn átti svo frábæran kafla síðustu fimm mínútur hálfleiksins og setti niður 8 stig inn í teignum. KFÍ leiddi því í hálfleik 37-33.

Í byrjun seinni hálfleiks náðu Valsmenn að jafna en í stöðunni 40-40 setti Pance niður þriggja stiga skot og í kjölfarið kom góður kafli hjá KFÍ. Þar munaði miklu um gott framlag frá Björgvin Snævari Sigurðssyni sem tók tvö sóknarfráköst og setti fjögur stig með stuttu millibili auk þess að berjast vel í vörninni. Valsarar náðu smám saman að komast aftur inn í leikinn og jöfnuðu 51-51 á þrítugustu mínútu og leiddu með einu stigi 53-54 þegar fjórðungurinn var úti.

Líkt og hina fjórðungana komu Valsarar aftur sterkari inn í upphafi þess fjórða og bættu í forystuna. Mest komust þeir í átta stiga forskot 54-62 á þrítugustu og fimmtu mínútu. Birgir þjálfari KFÍ brá þá á það ráð að beita pressuvörn sem virtist koma Valsmönnum nokkuð úr jafnvægi og skilaði KFÍ nokkrum stolnum boltum. Síðustu sex mínútur leiksins stjórnuðu okkar menn leiknum og sýndu yfirvegun, skynsemi og baráttu sem skilaði að lokum góðum sigri 71-62.

Nebojsa átti góðan leik í dag líkt og svo oft áður. Hann setti niður 24 stig tók 8 fráköst og gaf 5 stoðsendingar. Birgir Björn átti líka góðan leik skoraði 21 stig og tók 13 fráköst. Pance Ilievski setti 11 stig og Björgvin Snævar 9.

Hjá gestunum var Illugi Auðunsson bestur en hann skoraði 15 stig og tók 12 fráköst. Danero Thomas kom næstur með 14 stig 9 fráköst og 4 stoðsendingar.

BREYTTUR LEIKTÍMI! KFÍ mætir Valsmönnum heima

Það er komið að næsta heimaleik en karlalið KFÍ mætir val hér heima í 1. deild karla laugardaginn 22. nóvember kl. 14:00 ATH breyttur leiktími vegna þess að flugi var aflýst. Valsmenn fóru vel af stað í vetur og unnu þrjá af fyrstu fjórum leikjum sínum en töpuðu í síðustu umferð gegn ÍA.

Að vanda verður svo fírað upp í Muurikka pönnunni klukkan 18:30 og boðið upp á ljúffenga hamborgara.

Þeir sem ekki sjá sér fært að mæta á leikinn geta að sjálfsögðu fylgst með leiknum í beinni á KFÍ-TV.