Mikil gleði á Körfuboltadegi KFÍ

Hópurinn með bolina góðu frá Landflutningum og KKÍ.

Pizzurnar smökkuðust vel.

Hollustan í fyrirrúmi í pásunni og allt í boði Samkaupa.

Elstu iðkendurnir í góðum gír.

1 af 4

Körfuboltadagur KFÍ var haldinn með pomp og prakt á laugardaginn var og tóku hátt í 50 krakkar úr yngri flokkum félagsins þátt í honum. Barna- og unglingaráð stóð fyrir deginum sem hófst á æfingabúðum fyrir 8-15 ára krakka undir stjórn Labrenthiu Murdock, þjálfara og leikmanns meistaraflokks kvenna og Nebojsa Knezevic, leikmanns meistaraflokks karla. Leikmenn úr báðum meistaraflokkum félagsins aðstoðuðu einnig við þjálfunina og tókust búðirnar afar vel en markmiðið með þeim var að auka tækni og boltafærni iðkenda og skemmta sér í leiðinni.

Kristín Hálfdánsdóttir, svæðisstjóri Landflutninga/Samskipa á Ísafirði kom færandi hendi og gaf öllum iðkendum búðanna æfingaboli en bolirnir eru liður í öflugu samstarfi KKÍ og Landflutninga um eflingu yngri flokka körfuboltans um allt land.

Að búðunum loknum var boðið uppá pizzuveislu og að því búnu tók við fyrri leikur meistaraflokks karla sem fékk Þór Akureyri í heimsókn þessa helgi. Það var því sannkölluð körfuboltastemming á Torfnesi alla síðastliðna helgi. Ljóst er að margir ungir og efnilegir leikmenn leynast í yngri flokkum félagsins og verður spennandi að fylgjast með gengi flokkanna okkar á næstu misserum. Framundan eru bæði fjöllliðamót og minniboltamót en þar ber hæst Nettómótið í Reykjanesbæ sem fer fram helgina 6.-8. mars næstkomandi. Stefnt er að því að fara með sem flesta KFÍ iðkendur á Nettó líkt og gert hefur verið síðustu ár en mótið er ætlað iðkendum sem fæddir eru árið 2004 og síðar. 

Sigur í háspennuleik!

Birgir Björn Pétursson var maður dagsins í dag en hann tryggði sigur á lokasekúndu leiksins.

Karlalið KFÍ lagði Þór frá Akureyri í seinni leik liðanna í dag í algjörum háspennuleik á Jakanum. Þetta var mikill baráttuleikur og hnífjafn enda réðust úrslitin ekki fyrr en á síðustu sekúndunni þegar Birgir Björn setti niður skot eftir góða sendingu frá Nebosja. Úrslitin 75-74 KFÍ í vil og Birgir Björn maður dagsins!

Líkt og í gær hóf KFÍ leikinn betur og leiddi allan fyrri hálfleikinn, mest með 14 stigum. Í síðari hálfleik komust gestirnir svo betur inn í leikinn og jöfnuðu skömmu eftir að hálfleikurinn hófst og komstu svo fljótlega yfir. Eftir það var leikurinn í járnum og liðin skiptust á að leiða með fáum stigum ef ekki var jafnt. Lokasekúndurnar voru svo æsispennandi eins og sjá má í meðfylgjandi myndbandi frá KFÍ-TV. Vic Ian Damasin setti niður tveggja stiga körfu þegar 9 sekúndur voru eftir af leiknum og kom gestunum yfir 73-74. Nebosja var snöggur að koma boltanum í leik og Pance geystist fram völlinn og fann Nebosja aftur sem gerði atlögu að körfunni, dró í sig fjóra leikmenn Þórsara, og fann Birgi Björn lausan undir körfunni. Birgi brást svo ekki bogalistinn og lagði boltann í körfuna þegar aðeins ein sekúnda var eftir.

Sigurinn í dag var kærkominn eftir svekkjandi tap gærdagsins. Nebosja, Birgir Björn og Pance voru bestu menn KFÍ en einnig var ánægulegt að sjá ungan leikmann KFÍ, Helga Bergsteinsson, koma inn á með miklum látum, setja þrist, frákasta og berjast vel. Þar er á ferð efnilegur leikmaður sem heldur vonandi áfram á þessari braut. Hjá gestunum var Frisco Sandidge bestur, og trúlega besti maður vallarins líkt og í gær.

Nebosja var stigahæstur heimamanna í dag með 27 stig, 8 fráköst, 5 stoðsendingar og 4 stolna bolta. Næstur kom Birgir Björn með 22 stig og 10 fráköst. Pance var líka drjúgur með 18 stig og 5 fráköst. Helgi Bergsveinsson átti góða innkomu með 6 stig, 6 fráköst, 2 stoðsendingar og 3 stolna bolta. Jóhann Jakob var með 2 stig og 6 fráköst.

Hjá gestunum var Frisco Sandidge lang bestur með 25 stig og hvorki meira né minna en 20 fráköst auk 4 stoðsendinga og 3 stolinna bolta. Næstur kom Arnór Jónsson með 16 stig, Vic Ian með 13 en aðrir með minna.

Ítarleg tölfræði leiksins er aðgengileg á vef KKÍ.

Tap í fyrri leiknum gegn Þór

Panche fór fyrir leikmönnum KFÍ í dag.

Karlalið KFÍ tapaði fyrri leiknum af tveimur þessa helgina í baráttuleik við Þór Akureyri. Leikurinn endaði 71-77 gestunum í vil.

KFÍ hóf leikinn af miklum krafti með góðri pressuvörn sem skilaði sjö stiga forskoti þegar fyrsti leikhluti var úti. Þórsarar mættu ákveðnir til leiks í öðrum leikhluta og náðu að þétta vörnina verulega sem hafði það í för með sér að KFÍ skoraði aðeins 10 stig í leikhlutanum og heimamenn leiddu aðeins með þremur stigum í hálfleik. Þriðji leikhluti var svo hnífjafn og enn leiddu heimamenn með þremur stigum þegar honum lauk. Botninn datt svo algjörlega úr leik KFÍ síðasta leikhlutanum. Flest allar aðgerðir KFÍ voru fyrirsjáanlegar og einfalt fyrir Þór að verjast einstaklingsframtakinu sem var ráðandi í sóknarleiknum, mikið knattrak og lítið flæði í spilamennsku liðsins. Fyrsti sigur Þórs í deildinni því staðreynd.

Panche átti góðan leik og Nebojsa var einnig drjúgur.  Birgir Björn var að vanda öflugur í fráköstunum. Framlag annara leikmanna var töluvert minna.

Frisco Sandidge var þó maður vallarins og framlag hans fyrir Þórsliðið var frábært, skoraði mikilvægar körfur, var öflugur í fráköstum og í vörninni.  Átti heilt yfir skínandi leik.

Það voru ljósir punktar í leik KFÍ í dag svo sem pressuvörnin í upphafi. Þó er ljóst að menn verða að koma mun ákveðnari til leiks á morgun til að landa sigri og halda einbeitingu út leikinn og sömu ákefð og var fyrir hendi í upphafi leiks.

Ítarlega tölfræði má nálgast á vef KKÍ.

Tveir heimaleikir gegn Þór Akureyri

Birgir Örn Birgisson og strákarnir hans taka á móti Þór frá Akureyri í tveimur leikjum um helgina.

Það verður í nógu að snúast hjá leikmönnum karlaliðs KFÍ um helgina en strákarnir mæta liði Þórs frá Akureyri í tveimur leikjum á Torfnesi á sunnudag og laugardag kl. 14:00. Í 1. deildinni eru leiknar þrjár umferðir og til að spara ferðakostnað munu Þórsarar leika báða útileiki sína við KFÍ í sömu ferðinni.

Liðin mættust á Akureyri síðast í nóvember á Akureyri og þá fóru okkar menn með sigur af hólmi. Þetta eru afar mikilvægir leikir en með sigri í báðum leikjum getur KFÍ híft sig upp í fimmta sæti deildarinnar.

Báðir leikirnir hefjast sem fyrr segir kl. 14:00. Við hvetjum alla til að mæta og styðja við bakið á strákunum í þessum mikilvægu leikjum! 

Þeir sem ekki sjá sér fært að mæta á leikina geta að sjálfsögðu fylgst með þeim í beinni á KFÍ-TV.

Gunnlaugur genginn til liðs við KFÍ

Gunnlaugur Gunnlaugsson á siglingunni í leik með UMFB. Ljósmynd: Ingvi Stígsson.

Haukur Hreinsson hefur ákveðið að söðla um og er gengin til liðs við FSu. Ljósmynd: Ingvi Stígsson.

1 af 2

Gunnlaugur Gunnlaugsson framherji er genginn til liðs við KFÍ. Gunnlaugur er uppalinn í KFÍ og steig sín fyrstu skref með félaginu í yngri flokkum. Hann spilaði með meistaraflokki KFÍ veturinn 2005-2006 og lék alls 20 leiki með meistaraflokki á árunum 2005-2009. Gunnlaugur hefur stundað æfingar með Ármanni í Reykjavík í haust en lék síðast með UMFB í 2. deild karla tímabilið 2011-2012 þar sem hann skoraði að meðaltali 14 stig í leik og var með 10 fráköst.

Þá hefur Haukur Hreinsson ákveðið að söðla um en hann flutti um áramótin á Selfoss og gekk til liðs við FSu. Haukur var með 3,0 stig og 2,7 fráköst að meðaltali í 9 leikjum með KFÍ í vetur.

Birgir Björn og Linda Marín tilnefnd

Birgir Björn Pétursson er tilnefndur af KFÍ sem Íþróttamaður Ísafjarðarbæjar. Linda Marín Kristjánsdóttir er tilnefnd sem efnilegasti leikmaðurinn. Ljósmynd: Halldór Sveinbjörnsson.

Körfuknattleiksfélag Ísafjarðar hefur tilnefnt þau Birgi Björn Pétursson og Lindu Marín Kristjánsdóttur sem íþróttamenn Ísafjarðarbæjar. Birgir Björn er tilnefndur í flokknum Íþróttamaður Ísafjarðarbæjar en Linda Marín í flokknum Efnilegasti íþróttamaður Ísafjarðarbæjar.

Birgir Björn Pétursson er máttarstólpi í liði KFÍ.  Hann hefur þroskast mikið sem leikmaður á undanförnum árum og náði svo einu af markmiði sínu þegar hann var valinn í A landsliðs úrtak Íslands og rétt missti af sæti í einu af sterkasta landsliði sem Ísland hefur átt í körfuknattleik. Landsliði sem nú mun fara í fyrsta sinn í lokakeppni í Evrópumóti. Hann stefnir á að komast í A landsliðshópinn og æfir af miklum metnaði með það að markmiði.  Birgir er góð fyrirmynd innan sem utan vallar sem sýnir að með þrautseigju og elju geti menn náð markmiðum sínum.

Linda Marín Kristjánsdóttir er í hópi bestu körfuknattleiksleikskvenna landsins í sínum aldursflokki. Hún var í æfingahópi U-15 landsliðs KKÍ fyrir árið 2014 og var nýverið valin í æfingahóp U-16 liðsins fyrir árið 2015. Auk þess spilar hún stórt hlutverk í liði meistaraflokks kvenna KFÍ í 1. deildinni á yfirstandandi keppnistímabili, þrátt fyrir ungan aldur. Linda Marín er eljusöm keppnismanneskja sem leggur hart að sér við æfingar og keppni. Hún tekur stöðugum framförum og hefur bætt sig mikið sem leikmaður og liðsfélagi undanfarið ár.

Körfuboltadagur KFÍ

Laugardaginn 10. janúar, kl. 9-13, verða haldnar stuttar körfuboltabúðir fyrir iðkendur KFÍ og aðra áhugasama körfuboltakrakka í íþróttahúsinu Torfnesi, Ísafirði. Búðirnar eru ætlaðar krökkum í 3.-10. bekk og verður þátttakendum skipt í hópa eftir getu.

Yfirþjálfarar búðanna verða Nebojsa Knezevic og Labrenthia Murdock en þeim til aðstoðar verður einvalalið þjálfara, m.a. úr meistaraflokkum KFÍ.

Pizzuveisla í lok æfingabúðanna og síðan er öllum þátttakendum boðið á leik kl. 14 þar sem meistaraflokkur KFÍ tekur á móti Þór Akureyri í 1. deild karla.

Þátttökugjald er 500 krónur.

Jólakarfa á aðfangadag!

Misþreyttir eldri iðkendur eftir jólakörfuna 2013.

Hin árlega jólakarfa KFÍ fer fram á aðfangadagsmorgun í íþróttahúsinu Torfnesi. Upplagt tækifæri fyrir alla fjölskylduna til að slá tvær flugur í einu höggi; hreyfa sig og baða sig fyrir hátíðina. Allir velkomnir!

Dagskrá:

10:00-11:00
Jólakarfa fyrir yngri krakka 6-14 ára.

11:00-13:00
Eldri iðkendur.

Stjórn yngri flokka KFÍ óskar öllum iðkendum félagsins og aðstandendum þeirra gleðilegra jóla og farsæls nýs árs.

Samþykkt að ganga til sameiningar

Sameining íþróttafélaga á norðanverðum Vestfjörðum er hagsmunamál sem snertir ekki síst barna- og unglingastarf félaganna.

Í gærkvöldi var samþykkt á félagsfundi KFÍ að taka fullan þátt í sameiningu íþróttafélaga á norðanverðum Vestfjörðum. Á fundinum kynnti Gísli Jón Hjaltason, formaður Boltafélags Ísafjarðar og Sævar Óskarsson, fyrrverandi formaður KFÍ, vinnu undirbúningshóps um sameiningu íþróttafélaganna. En þeir hafa, ásamt Sigurði Hreinssyni, formanni Blakfélagsins Skells, unnið að tillögum þessa efnis og kynnt þær fyrir íþróttafélögum á svæðinu.

Í kjölfar kynningar Gísla Jóns og Sævars var borin upp tillaga þess efnis að KFÍ taki þátt í sameininganefndinni sem verður skipuð tveimur fulltrúum frá hverju íþróttafélagi auk eins oddamanns sem sameiningarnefndin tilnefnir. Tillagan var samþykkt samhljóða. Þvínæst voru þeir Guðni Ólafur Guðnason og Sævar Óskarsson kosnir samhljóða sem fulltrúar KFÍ í sameiningarnefndinni.

Miðað er við að nefndin skili niðurstöðum fyrir 1. apríl næstkomandi.

Sjá nánar í fundargerð félagsfundarins.

Glæsilegur sigur á Fjölni

Stelpurnar náðu þriðja sætinu í deildinni eftir sigur á Fjölni á sunnudaginn.

Kvennalið KFÍ hefur verið á mikilli siglingu undanfarið og gerði sér lítið fyrir í gær, sunnudaginn 14. desember, og sigraði lið Fjölnis hér heima. Leiknum lauk með 10 stiga sigri 58-48 fyrir KFÍ. Þar með hafa stelpurnar sigrað þrjá leiki í röð og fara inn í jólafrí í þriðja sæti deildarinnar með þrjá sigra og þrjú töp.

Leikurinn fór nokkuð brösulega af stað en KFÍ braut ísinn á þriðju mínútu þegar Eva Margrét setti niður tvö víti. Gestirnir í Fjölni jöfnuðu svo skömmu síðar en Eva Margrét fór aftur á vítalínuna og kom KFÍ yfir á ný. Eftir það var ekki aftur snúið og hélt KFÍ forystu út allan leikinn. Undir lok fyrsta leikhluta og í byrjun annars náðu KFÍ stelpur góðum kafla og leiddu með 8-14 stigum út leikinn.

Allir leikmenn KFÍ lögðu sitt af mörkum líkt og í síðasta leik gegn FSu. Labrenthia Murdock Pearson daðraði við tvöfalda þrennu, var með 19 stig, 9 fráköst og 9 stolna bolta auk 7 stoðsendinga. Eva Margrét átti einnig góðan leik líkt og svo oft í vetur með 17 stig, 8 fráköst 2 stolna bolta. Alexandra Sif Herleifsdóttir var öflug inn í teygnum, skoraði 7 stig, tók 13 fráköst og 2 stolna bolta. Linda Marín skoraði 7 stig og tók 7 fráköst, Saga skoraði 6 stig og tók 4 fráköst, Hekla skoraði 2 stig og tók 2 fráköstog Rósa gaf 2 stoðsendingar og stal 4 boltum.

Hjá Fjölni var Erla Sif Kristinsdóttir stigahæst með 16 stig, 8 fráköst og 3 stolna bolta. Gréta María Grétarsdóttir var með 11 stig og 16 fráköst. Sigrún Anna Ragnarsdóttir var með 8 stigog 6 fráköst, aðrir leikmenn með minna.

Sjá nánar ítarlega tölfræði á vef KKÍ.