Fréttir - Knattspyrna

BÍ/Bolungarvík - Þróttur

Knattspyrna | 19.01.2011 BÍ/Bolungarvík mætti Þrótti í Egilshöll í gærkvöldi. Leikmenn voru mættir kl. 20:30 í Egilshöll eða á svipuðum tíma og flautað var til leiks hjá Íslandi og Austurríki. Guðjón fór yfir leikaðferð og tilkynnti byrjunarlið á meðan stórglæsilegt þjálfarateymið sá til þess að allt var til staðar.

Byrjunarliðið var þannig skipað:
Þórður - Axel, Birkir, Atli, Sigurgeir - Gunnar Már, Sölvi, Alexander - Arnór, Óttar og Andri.
Á bekknum sátu þeir Ásgeir Guðmunds, Matti, Haffi og Sigþór.

Við hófum leikinn ágætlega, létum boltann ganga ágætlega í vörninni en erfiðlega gekk að skapa eitthvað marktækt fram á við. Þegar við svo komumst í góðar stöður á vellinum að þá vantaði upp á seinustu sendingu eða að menn væru almennilega á tánum. Þróttarar voru ágætir og gekk spil þeirra betur en okkar. Þeir sköpuðu sér þó ekki nein marktækifæri í leiknum en unnu þó 2-0. Fyrsta mark þeirra var sjálfsmark þegar undrabarnið Gunnar Már Elíasson ætlaði að hreinsa boltann burt en ekki vildi þó betur til en að sú hreinsun hafnaði í samherja og inn. Stuttu seinna komust Þróttarar inn fyrir vörn okkar, Þórður var kominn langt út og braut á sóknarmanni Þróttar utarlega í teignum. Dæmt var víti og úr því skoruðu þeir. 2-0 í hálfleik.

Seinni hálfleikurinn hófst á því að okkar menn klæddu sig í græn vesti þar sem búningar liðanna voru mjög líkir. Að sjálfsögðu verður búningunum kennt um mörk fyrri hálfleiksins. Seinni hálfleikurinn var ekki mikið fyrir augað. Þróttur mun meira með boltann en sköpuðu sér fá færi. Þórður í markinu greip líka vel inn í þegar á þurfti. Sóknarleikur okkar var nánast engin í seinni hálfleik og endaði leikurinn með 2-0 sigri Þróttar

Næsti æfingarleikur liðsins verður á laugardaginn á Akranesi kl. 13:00
Nánar

Status update...

Knattspyrna | 18.01.2011 Eins og kom fram í síðustu frétt og á facebook að þá er æfingarleikur í kvöld. Síðan mun hefjast þétt leikjatörn fram á vor með vikulegum æfingarleikjum og deildarbikar. Um leið og komið er á hreint hvenær æfingarleikirnir verða leiknir, þá verða þeir uppfærðir í dagatalið.

Af leikmannamálum ber hæst að nefna að von er á Letta og Litháa til landsins á reynslu hjá félaginu. Goran Vujic er einnig væntanlegur og eru það frábærar fréttir að hann sé kominn á fulla ferð eftir erfitt meiðslaár í fyrra. Jónmundur Grétarsson sem kom til okkar á láni um mitt síðasta sumar og skoraði 10 mörk í 10 leikjum hefur einnig hafið æfingar hjá félaginu. Sigurgeir, Haffi og Matti eru allir komnir á höfuðborgarsvæðið til að taka þátt í undirbúningi liðsins fyrir sumarið. Nánar

Æfingarleikur í kvöld

Knattspyrna | 18.01.2011 BÍ/Bolungarvík leikur æfingarleik í kvöld klukkan 21:30 við Þrótt. Leikurinn fer fram í Egilshöll. Liðin tvö munu einnig mætast í 1.deildinni í sumar. Nánar

Innanhúsmótið verður um næstu helgi

Knattspyrna | 15.01.2011 Þá er það ljóst: innanhúsmótið verður um næstu helgi, laugardag og sunnudag frá ca. 9:00-17:00 báða dagana. Þó má gera ráð fyrir að sunnudagurinn verði örlítið styttri. Eins og venjulega munu 7. og 8. flokkarnir bara spila á laugardeginum og byrja mótið þann daginn. Leikjaplanið verður sett inn á síðuna þegar það er tilbúið og verður það undir "gögn fyrir foreldra" hér vinstra megin. Nánar

Þórður Ingason í BÍ/Bolungarvík (Staðfest)

Knattspyrna | 04.01.2011 BÍ/Bolungarvík hefur keypt markvörðinn Þórð Ingason frá Fjölni en þetta staðfesti Guðjón Þórðarson þjálfari liðsins við Fótbolta.net í dag. Þórður gerði tveggja ára samning við BÍ/Bolungarvík.

,,Við erum að semja við ungan og efnilegan markmann. Ég hlakka til að vinna með honum og bæta hann. Um leið og hann bætir sig þá bætir hann okkur,"
sagði Guðjón við Fótbolta.net í dag.

Róbert Örn Óskarsson varði mark BÍ/Bolungarvíkur á síðasta tímabili en hann hætti hjá liðinu fyrir áramót.

Nú er ljóst að Þórður kemur í hans stað en þessi 22 ára gamli markvörður er uppalinn hjá Fjölni. Á síðasta tímabili var Þórður í láni hjá KR þar sem hann lék tvo leiki í Pepsi-deildinni. Áður lék Þórður 69 deildar og bikarleiki með Fjölnismönnum en hann var einnig í láni hjá Everton í nokkra mánuði árið 2006. Þórður á sautján landsleiki að baki með yngri landsliðum Íslands en hann er ennþá gjaldgengur í U21 árs landsliðið og var kallaður inn í hópinn fyrir fyrri leikinn gegn Skotum síðastliðið haust.

Frétt frá Fótbolta.net. Sjá alla fréttina: http://fotbolti.net/fullStory.php?action=viewStory&id=102225#ixzz1A4lN2sEL Nánar

Gleðileg Jól

Knattspyrna | 24.12.2010 BÍ/Bolungarvík óskar stuðningsmönnum nær og fjær, sem og landsmönnum öllum, gleðilegra jóla og farsældar á komandi ári, með þökk fyrir stuðningin á árinu sem er að líða. Hafið það sem allra best um jólin og án ykkar hefði sumarið aldrei orðið eins gott og raun bar vitni.

Með fótboltajólakveðju,
Áfram BÍ/Bolungarvík! Nánar

Yfirþjálfari ráðinn til félagsins

Knattspyrna | 17.12.2010 Jón Hálfdán Pétursson hefur verið ráðinn sem yfirþjálfari yngri flokka BÍ88. Í því felst að hann skal hafa yfirumsjón með starfi yngri flokka auk umsjónar og aðlögunar í starfi annarra þjálfara félagsins. Þar telst eftirfylgni, tækniráðgjöf, þjálfunarráðgjöf, tækniprófanir og önnur fagleg yfirumsjón yngri flokka. Yfirþjálfari heyrir beint undir stjórn unglingaráðs BÍ88.
Um leið er Jón Hálfdán ráðinn starfsmaður félagsins. Í því felst fyrst og fremst aðstoð við stjórnir félagsins, þ.e. stjórn unglingaráðs og stjórn meistaraflokksráðs og önnur störf eins og:
- samskipti við KSÍ (félagaskipti, mótamál, dagsetningar leikja, heimsóknir aðila, námskeiðahald, fræðslumál, lög og reglur)
- rukkanir æfingagjalda í samráði við gjaldkera
- daglegt starf í samráði við stjórnir (samskipti við HSV og önnur félög/sambönd, aðstoð við mótahald (leikjaniðurröðun og skipulag), umsjón skrifstofu)
- aðstoð við þjálfara við skipulag ferða (æfinga- eða keppnisferða) þar sem starfsmaður skal taka saman og láta í té upplýsingar um kosti og kjör við ferðalög og gistingu.
- uppfærsla á vefsíðu félagsins og samskipti við foreldra, styrktaraðila og aðra þá er að starfinu koma.

Þá er Jón Hálfdán einnig ráðinn þjálfari 2. flokks karla hjá BÍ88. Í því felst stjórn allra æfinga á vegum flokksins, skipulag/ákvörðun æfinga- og keppnisferða og annað það starf er að þjálfuninni lýtur. Um leið tekur hann að sér afreksbraut MÍ í knattspyrnu en þar eru æfingar tvisvar í viku, frá kl. 6:30-8:00 í samráði við skólann.
Stofnað hefur verið foreldraráð í 2. flokki Jóni Hálfdán til aðstoðar og mun það koma að tekjuöflun starfsins, skipulagi, fararstjórn og annarri þeirri aðstoð sem Jón Hálfdán óskar eftir.

 

Boltafélagið lýsir yfir ánægju sinni með ráðningu Jón Hálfdáns og býður hann velkominn til starfa. Megi það verða gæfuríkt og gefandi.

Nánar

BÍ/Bolungarvík - Tindastóll/Hvöt

Knattspyrna | 12.12.2010 BÍ/Bolungarvík tók á móti nýsameinuðu liði, Tindastól/Hvöt síðastliðinn laugardag. Leikmenn voru mættir um kl.11 upp á skaga og við tók djús og ristað brauð. Eftir það var töflufundur og síðan hófst leikurinn kl.13. Í markinu lék markmaður sem við fengum lánaðan frá ÍA í leikinn.

Byrjunarliðið var þannig skipað:
Lánsmðaur - Sigþór, Sigurgeir, Atli, Haffi - Gunnar Már, Sölvi, Alexander - Matti, Óttar og Andri.
Á bekknum sátu þeir Ásgeir Guðmunds, Axel Lárusson og Arnór Þrastarson.

Við byrjuðum leikinn mun betur og vorum fljótlega komnir í 1-0 eftir laglega sókn. Matti átti þá góða fyrirgjöf frá hægri sem Gunnar Már skallaði laglega í netið. Tindastóll/Hvöt voru sprækir um miðbik hálfleiksins og áttu margar flottar sóknir. Þeir sköpuðu samt enga verulega hættu fyrir framan mark okkar. Dómarinn gaf þeim þó vítaspyrnu sem var vægast sagt ódýr en markmaðurinn okkar varði vítið auðveldlega. Staðan 1-0 í hálfleik.

Seinni hálfleikur einkenndist af mikilli baráttu og lítið um fallegar sóknir. Við náðum þó að komast í 2-0 eftir skyndisókn um miðjan hálfleikinn. Aftur var það Matti sem gaf fyrir markið og á fjærstöng var Arnór Þrastarson mættur og skoraði örugglega. Í lokin náðu Tindastóll/Hvöt að setja smá pressu á okkur, þeir voru með mun stærri hóp og við orðnir þreyttir að mæta óþreyttum leikmönnum. Þeir minnkuðu muninn í lokin og þar við sat. 2-1 sigur staðreynd.

Þetta var góður sigur þó spilið hafi verulega höktað. Eftir að við komumst mjög snemma yfir í leiknum, eftir að hafa stjórnað honum, þá var eins og menn hafi slappað af og haldið að hlutirnir gerðust að sjálfu sér. Sigurinn var þó fyllilega sanngjarn og ef menn hefðu spilað eins og menn allan leikinn hefðum við unnið mun stærri sigur. Tindastóll/Hvöt voru sprækir en spurning er hvort lið þeirra er nógu gott í 2.deild. Heyrst hefur að þeir séu einnig að reyna sameinast Kormáki frá Hvammstanga, Smárinn frá Varmahlíð og Neista Hofsósi. Mun það verða fyrsta liðið sem tekur þátt á íslandsmóti og inniheldur fjögur skástrik í nafni liðsins, Tindastóll/Hvöt/Kormákur/Smárinn/Neisti. Nánar

BÍ/Bolungarvík - Leiknir

Knattspyrna | 04.12.2010 BÍ/Bolungarvík tók á móti Leikni Reykjavík á Akranesi kl.13 í dag. Fyrir viku síðan töpuðu okkar menn illa fyrir ÍA en leikurinn var þó góð kennslustund. Menn tóku daginn snemma og voru komnir upp á skaga kl.11 þar sem Gaui reiddi fram ristað brauð og ávexti. Eftir að menn höfðu fengið næringu var komið að töflufundi þar sem Guðjón tók varnarleikinn í gegn hjá okkar mönnum og sýndi þeim nokkur grunnatriði í varnarleik. Tveir nýjir leikmenn tóku þátt í leiknum sem ekki hafa verið með okkur áður. Þetta voru þeir Tórður Thomsen markmaður sem spilaði seinast með færeysku meisturunum í HB og Alexander Veigar Þórarinsson sem spilaði í sumar með Fram. Einnig lék Birkir Halldór Sverrisson fyrsta leik sinn með okkur eftir nokkurt hlé en hann hóf æfingar fyrir stuttu.

Byrjunarliðið var þannig skipað:
Tórður Thomsen - Haffi, Atli Guðjónsson, Birkir, Sigurgeir - Sigþór, Gunnar Már, Sölvi GylfasonArnór Þrastarson, Alexander Veigar Þórarinsson - Andri Rúnar.
Á bekknum sátu þeir Guðni Páll, Ásgeir Guðmunds, Axel Lárusson og Óttar.

Við mættum mun betur stemmdir til leiks heldur en á móti ÍA, þó svo að Leiknir hafi verið mikið mun meira með boltann þá voru menn að spila mjög þéttan varnarleik, fóru á fullu í návígi og ekkert gefið eftir. Leikinsmenn náðu nokkrum sinnum að skapa sér álitlegar sóknir sem annað hvort stoppuðu á Birki og Atla eða Tórði í markinu sem var mjög öflugur í dag. Ólíkt við leikinn í síðustu viku þá voru við að ná að brjóta niður margar sóknir Leiknismanna en tókst illa að gera eitthvað marktækt við boltann þegar að því kom. Þó áttum við 2-3 tækifæri og með smá heppni hefðum við getað skorað úr einu þeirra. 0-0 í hálfleik.

Í seinni hálfleik þá skiptum við varamönnunum inn á og "róteruðum" á 15 mín. kafla á meðan Leiknismenn voru með mun stærri hóp en við í leiknum. Það fór að liggja vel á okkur um miðbik hálfleiksins en flest allar fyrirgjafir og skot stoppuðu á Tórði. Leiknismenn náðu þó góðri sókn þegar um tuttugu mínútur voru eftir og skoruðu laglegt mark eftir flott spil, staðan 0-1. Eftir það átti Tórður stórbrotna markvörslu frá einum leikmanni Leiknis úr dauðafæri. Síðustu tíu mínúturnar fór töluvert að losna milli miðju og varnar hjá Leikni og áttum við nokkra "sénsa" á að sækja hratt á þá en lítið gekk. Það var síðan á 90. mínútu þegar Andri Rúnar kemst í stöðuna "einn á einn" á móti varnarmanni í vítateignum. Andri tekur fjögur skæri í öðru veldi og fer leiftursnöggt til hliðar og skilur varnarmanninn eftir á hælunum sem þó reynir að ná til boltans en fellir Andra klaufalega. Vítaspyrna dæmd og Andri steig sjálfur á punktinn og skoraði af miklu öryggi. Stuttu seinna flautaði dómarinn til leiksloka og lokatölur 1-1.

Ágætis leikur í dag hjá okkur þó sóknarleikurinn sé ekki alveg kominn í gang. Það má segja að jafnteflið hafi verið sanngjörn úrslit og eru þessir leikir að nýtast okkur mjög vel í undirbúningi fyrir sumarið. Liðið lék mun betur heldur en í síðustu viku þó færin hafi verið betri fyrir viku. Áætlað er að spila við Tindastól/Hvöt á næsta laugardag. Nánar

Jólafríið skollið á

Knattspyrna | 02.12.2010 Þá er komið jólafrí eins og flestir vita en við höfum gert þetta undanfarin tvö ár. Áður var alltaf frí í september en við ákváðum að nota tímann frekar þá, vera úti og æfa eins mikið og við gætum en taka fríið í desember enda hefur alltaf komið truflun á starfið í jólamánuðinum vegna annars frís, hátíðisdaga, lokunardaga í íþróttahúsunum og ferðalaga fjölskyldna.
Æfingar hefjast svo aftur um leið og skólinn hefst eftir jólafrí og þá ættu allir að vera endurnærðir og vel saddir eftir hátíðarnar. Við viljum samt benda ykkur á að nú er kjörið að fara út á sparkvöll og leika sér í fótbolta, það þarf enginn að láta sér leiðast þó að æfingar séu ekki í gangi í mánuðinum... Nánar