Stelpurnar í stúlknaflokk í undanúrslit á Íslandsmótinu á föstudag

Sameiginlegt lið KFÍ/Tindastóls er á leið í undanúrslit og mun spila gegn gríðarlega sterku liði Keflavíkur. Stelpurnar eru samt sem áður ekkert nema tilhlökkun fyrir þessu verkefni og við skulum muna að þær eru þarna meðal fjögurra bestu liða á landinu og hafa staðið sig frábærlega í vetur og eru að uppskera samkvæmt því.

Leikurinn hjá stelpunum er á föstudagskvöld kl.20.00 og verður í Ljónagrfjunni í Njarðvík. Vonum við að sem flestir láti sjá sig og styðji þær til dáða. 

Þjálfarar þeirra í þessum slag eru þau Stefánía Ásmundsdóttir og Karl Jónsson.

Áfram KFÍ

Og þá er það Arnar Guðjónsson í hópinn

Arnar Guðjónsson er einn af okkar allra efnilegustu þjálfurum. Hann hefur með miklum dugnaði náð góðum árangri á ferli sínum og verið aðalþjálfari hjá Aabyhoj í efstu deildinni í Danmörku.  Arnar byrjaði sinn þjálfunarferil hjá Sindra 2005-2007.  2007-2009 var hann aðstoðarþjálfari Fsu, 2009-2011 varð hann aðstoðarþjálfari Aabyhoj og 2011 tók hann við sem aðalþjálfari liðsins auk þess að vera aðstoðarþjálfari U-18 ára landsliðs Ísland.  Arnar er núna þjálfari U15 landsliðs Íslands. Þetta er í annað skiptið sem Arnar kemur í æfingabúðirnar en hann var hér í fyrra við góðan orstýr.

Borce vinur okkar kemur í æfingabúðirnar

Borce Ilievski sem þjálfaði hjá okkur í mörg ár og er núverandi þjálfari Breiðabliks er á leið heim í sæluna og verður einn af þjálfarateyminu í æfingabúðum KFÍ 2013. Það ættu allir að kannast við kappann, en hann hefur gert marga frábæra hluti fyrir körfuboltann á Íslandi og er mikið gleðiefni að fá kappann til starfa hjá okkur. Enn frekari fréttir koma á næstu dögum. Hver er næstur?

Finnur Freyr yfirþjálfari körfuboltabúða KFÍ 2013

Finnur Freyr Stefánsson verður yfirþjálfari körfuboltabúða KFÍ 2013 en hann er okkur vel kunnur og er mikil tihlökkun að fá hann til starfa á ný hér við búðirnar. Það þarf ekkert að fara mörgum orðum um afrek drengsins en Finnur Freyr hefur verið lykilmaður í þjálfun yngri flokka KR til margra ára og er núna þjálfari kvennaliðs KR sem og aðstoðarþjálfari mfl. karla hjá félaginu. Fleiri þjálfarar verða kynntir á næstu dögum, en það stefnir í enn einar frábærar búðir fyrir iðkendur og þjálfara. 

Æfingabúðir KFÍ 2013 að verða klárar

Velkomin aftur vinur

Það fer að styttast í okkar árlegu æfingabúðir sem eru núna 5-10.júní og erum við að klára uppröðun á þjálfurum og verður kynnig á þeim klár á næstu dögum. Það er þó gaman að henda út hér að Geof Kotila hinn mæti þjálfari og vinur okkar kemur aftur til okkar. Við erum að klára að ganga frá samningum við aðra og segjum frá endanlegum lista bráðlega.

Guðjón á skrifstofuna

Stjórn KFÍ hefur fengið Guðjón Þorsteinsson til að sinna daglegum verkefnum fyrir KFÍ fram yfir körfuboltabúðir.

Hann mun sinna verkefnum í umboði stjórnar og unglingaráðs.

Allir þekkja Guðjón af áratuga störfum hans fyrir félagið og er hann boðinn hjartanlega velkominn til starfa.

Körfuboltabúðir KFÍ 2013

Það fer að styttast í fjörið

Búðirnar hefjast miðvikudaginn.5 júní kl.10.00 og þeim lýkur mánudaginn 10. júní kl.12.00. Þær eru ætlaðar körfuboltaiðkendum frá 10 ára aldri og uppúr.

Samhliða búðunum verður boðið upp á þjálfaranámsskeið frá föstudeginum 7. júní til sunnudagsins 10. júni og verður ekki rukkað fyrir námskeiðið. Þarna er klárlega á ferðinni kjörið tækifæri fyrir metnaðarfulla þjálfara að slá tvær flugur í einu höggi, bæta við þekkingu sína og njóta töfra Vestfjarða!

Skráningar í búðirnar og á þjálfaranámsskeiðið sendist á netfangið kfibasketball@gmail.com, einnig er hægt að fá frekari upplýsingar hjá Guðjóni Þorsteinssyni í síma 896-5111.

Taka verður fram í skráningu:

* Nafn iðkenda og kennitölu

* Forráðamaður, netfang og símanúmer

* Félag (ekki nauðsynlegt)

* Hvað iðkandinn er skráður í (allur pakkinn, eða hlutar)

* Sérþarfir iðkenda (lyf, ofnæmi og annað)
 

Verð fyrir þjálfun, gistingu og fullt fæði er samtals kr. 40.000.  

Ef einstakir hlutar pakkans eru teknir út þá kostar hver eining:

Stakar búðir kosta kr. 22.000, gisting í 6 nætur kr. 8.000 og fullt fæði kr.15.000. 

Tryggingargjald fyrir herbergi er kr. 2.000 sem greiðist til baka ef frágangur á herbergi telst góður.

Þegar pöntun er móttekin er staðfesting send til baka.

 
Praktísk atriði:

Gistingin er svefnpokagisting, boðið er upp á rúm en taka þarf með svefnpoka eða sængur og kodda.

Foreldrar/fararstjórar munu hafa aðgang að þvottavélum þannig að óþarfi er að hafa föt til skiptanna fyrir alla dagana.

Frítt verður í sund fyrir þátttakendur þannig að upplagt er að taka sundfötin með og teygja úr sér í pottinum á milli æfinga.

Urðu undir Keflavíkurhraðlestinni

KFÍ-b í ham. Mynd: Ingvi Stígsson / Úr safni

KFÍ og Keflavík mættust á laugardaginn í B-liða deild karla í gryfjunni í Bolungarvík. Leikurinn skipti hvorugt lið miklu máli, nema upp á stoltið, því Keflavík var þegar búið að tryggja sér 2. sætið í deildinni og sæti í úrslitakeppninni á meðan KFÍ var í 5. sæti og átti ekki möguleika á að komast ofar.

Lokaleikur B-liðsins

Þá er komið að lokaleik B-liðs KFÍ á leiktíðinni en hann er ekki af verri endanum því í heimsókn kemur B-lið Keflavíkurstórveldisins.

Undir svona stórleik dugir að sjálfsögðu ekkert nema hið besta og því fer leikurinn fram í gryfjunni í Bolungarvík.

Þetta er síðasti séns Vestfirðinga til að sjá allar helstu stjörnur gærdagsins spila því allar líkur eru á að þeir komi ekki til með að passa í búningana á næsta ári.

Hleðsla í boði KFÍ og MS

Á morgun munu KFÍ og MS gefa iðkendum sínum hinn frábæra súkkulaðidrykk Hleðslu og hvetjum iðkendur okkar að koma og fá sér nokkrar fernur. Mun Gaui.Þ verða á Jakanum eftir kl.14.00 og afhenda fólkinu okkar þetta á meðan birgðir endast og eru allir iðkendur eða forráðamenn þeirra velkomnir.