Skellur með brons í 3. deild - Jamie besti leikmaðurinn

Blak | 26.03.2011 Kvennalið Skells lenti í 3. sæti í 3. deild kvenna. Skellur hafði unnið alla sína leiki í deildinni í vetur, en fyrirkomulagið var þannig að í lokin var spilað til undanúrslita og svo til úrslita. Í undanúrslitaleiknum biluðu taugarnar örlítið og Skellur tapaði honum og spilaði þess vegna um 3. sætið. Sá leikur vannst í skemmtilegum baráttuleik við Víking Reyni og því fór bronsið til Skells. Það var pínu sárt að lenda ekki ofar því Skellur hefur unnið 16 af 17 leikjum í deildinni í vetur, en það þurfti víst að vinna réttu leikina. En brons er fallegt líka og þetta er besti árangur Skells á Íslandsmótinu í blaki.

Þjálfari Skells, Jamie Landry var síðan valin besti leikmaður 3. deildar, enda hefur hún spilað feikilega vel í vetur bæði í sókn og vörn. Góður endir á góðu tímabili hjá þjálfaranum, en hún er of ung til að spila með á öldungamótinu sem verður í Vestmannaeyjum í maí og er næsta stóra verkefnið hjá Skelli Nánar

Úrslitamót 3. deildar - allt undir

Blak | 25.03.2011

Meistaraflokkur kvenna keppir nú á lokamótinu í 3. deild Íslandsmótsins í blaki. Liðið hefur náð einstaklega góðum árangri í vetur og er enn taplaust í 3. deild. Það hjálpar þó lítið fyrir þetta lokamót þar sem stigin flytjast ekki áfram. Keppt verður í tveimur riðlum og munu efstu tvö liðin úr hvorum riðli spila í kross til undanúrslita og síðan verður úrslitaleikur um 1. sætið í 3. deild. Efsta liðið tryggir sér sæti í annarri deild á næsta tímabili.

Skellsliðið er í feiknaformi um þessar mundir og mun gera allt til að fylgja eftir góðum árangri í vetur. Þó mun vanta einn sterkan leikmann sem hefur verið drjúgur á mótum vetrarins, þar sem Sara kemst ekki með á mótið. Á móti kemur að breiddin í liðinu er það góð að þetta ætti ekki að koma að sök.

Áfram Skellur!

Nánar

Ferðin á Íslandsmótið

Blak | 23.03.2011

Föstudagur 1. apríl
12:30 Mæting í flug. Allir þurfa að vera búnir að borða hádegismat.
14:00 Farið upp í Egilshöll á bílaleigubílum og einkabílum
14:30 Farið á skauta í Egilshöll - skautar verða leigðir á staðnum
16:00 eða 17:00  Bíó í Egilshöll, popp og drykkur fyrir alla
19:00 Kvöldmatur á veitingastað
20:30 Farið í Mosfellsbæ þar sem gist verður í skóla

Laugardagur 2. apríl
Mót allan daginn.
Upplýsingar um leiki verða á www.krakkablak.bli.is
Kvöldvaka um kvöldið

Sunnudagur 3. apríl
Mót fram yfir hádegi
Farið heim með seinna flugi

Kostnaður: kr. 9000 á barn, greiðist í síðasta lagi á miðvikudag 30. mars
Inni í því er:
Flugfar
Bílaleigubílar
Skautar
Bíó, popp og drykkur
Matur á föstudagskvöldi
Gisting
Morgunmatur, hádegismatur og kvöldmatur á laugardegi
Morgunmatur og hádegismatur á sunnudegi
Ávextir og annað nasl á mótinu
Mótsgjöld
ATH: Ekki má koma með auka vasapening

Það sem þarf að taka með:
Svefnpoki/sæng
Dýna
Hnéhlífar
Skór
Upphitunargalli

Þjálfarar og fararstjórar: Jamie, Harpa, Þorgerður, Sólveig, Venni, Gunnar Páll, Alda

Nánar

Krakkablak - æfingar og Íslandsmót

Blak | 23.03.2011 Æfingar hjá 4. og 5. flokki falla niður á föstudaginn vegna ferðar meistaraflokks kvenna á 3. deildar mót. Í staðinn verður samæfing á Suðureyri á fimmtudaginn kl. 16-18. Farið verður með rútunni kl. 15 frá Ísafirði og komið aftur með rútu kl. 19. Jamie fer með krökkunum í rútuna - og er ætlunin að hittast í strætóskýlinu við Stjórnsýsluhúsið. Allir þeir sem eru að fara á Íslandsmót ættu að mæta og allir hinir eru velkomnir líka. Það væri gott fyrir börnin að taka með smá nesti og sundföt.

Æfingin hjá 7. flokki (1.-4. bekk) verður eins og venjulega kl. 13 á föstudaginn.

Íslandsmótið fyrir 4. og 5. flokk verður helgina 1.-3. apríl. Upplýsingar eru undir tenglinum krakkablak hér til hliðar. Nánar

Ólympíuleikarnir og veðrið

Blak | 06.03.2011 Veðrið leikur ekki beinlínis við okkur fyrir útiþrautirnar en við ætlum samt að halda okkur við þær - enda enginn verri þótt hann vökni, nú eða fjúki :-).  Við hittumst í andyrinu í Torfnesi kl. 12 og förum svo út í svona 30-40 mínútur áður en við komum inn aftur. Ef einhverjir treysta sér ekki til að vera úti geta þeir mætt 12:45 í inniþrautirnar. Nánar

Blak Ólympíuleikar

Blak | 03.03.2011  

Staðsetning : Torfnesi 6 mars kl. 12 - 15 .  Bæði úti og inni

 
Hafa þarf meðferðis :

Útifatnað: klæða sig eftir veðri til útiþrauta ( úlpa , húfa , vettlingar )

Innanhús íþróttaföt : góða skó, hlífar og  vatn 

Matur: Allir að koma með eitthvað smávegis  matarkyns á sameiginlegt hlaðborð sem verður í boði fyrir allan hópinn í matar/ hvíldar  pásum. Reynum að hafa hollustuna í fyrirrúmi, ávexti , grænmeti , kökur , smurt o.þ.h

 

Hvað verður gert :

Í boði verða blakæfingar og þrautir þar sem barn og foreldri keppa saman í tveggja manna liðum. Að sjálfsögðu getur einhver annar fullorðinn komið með barninu. Barnið tekur þátt í þrautunum og foreldrið fylgir sínu barni eftir og tekur þátt ,foreldrar geta skiptst á að taka þátt ef báðir mæta.

Blakarar úr meistarflokki Skells( konur og karlar ) verða á staðnum til aðstoðar við leikana og ef einhverjir foreldrar þurfa að fara áður en leikunum lýkur gætu þessir aðilar komið í staðinn.

Leikarnir hefjast utandyra kl: 12.00 og að þeim loknum færum við okkur inn ,salnum verður skipt upp í 3 stöðvar . Fólk er beðið um að mæta tímanlega til að hægt sé að halda áætlun. Krökkunum verður skipt upp eftir flokkum ( 7 flokkur , 6 flokkur , 5 flokkur , 4 flokkur ). Þrautirnar verða útfærðar þannig að þær henti öllum. T.d. geta yngstu krakkarnir notað sundbolta í stað blakbolta.

Allir þáttakendur fá verðlaun í lok leikana - sem þó verða óhefðbundin, ekki endilega neinn hlutur.

 

Vinsamlegast látið Jamie vita á æfingu hverjir mæta eða á netfangið: jme1607@gmail.com

 

Þrautir utandyra

Hjólbörukeppni  ( þar sem barnið er hjólbaran ), snjóboltastríð , snjókarlakeppni , o.f.l.

 

Þrautir innandyra

Halda boltanum á lofti með bagger á tíma,  fingurslag á tíma ,  Hávörn í vegg, smass o.f.l

                                                                                                        
         

                                                                                                                     Blakfélagið Skellur

                                                                                                                     Krakkablakráð

Nánar

Fyrstu blak-ólympíuleikar Skells

Blak | 28.02.2011 Sunnudaginn 6. mars kl. 12-15 verða haldnir fyrstu blak-ólympíuleikarnir á Ísafirði. Þetta fer þannig fram að hvert barn hefur með sér foreldri/forráðamann (eða einhvern annan fullorðinn) og saman taka þau þátt í ýmsum þrautum. Þetta á bara að vera létt og skemmtilegt. Hver fjölskylda er beðin um að koma með eitthvað ætilegt til að deila með sér. Við mælum með því að hollustan sé í fyrirrúmi, t.d. væri hægt að koma með niðurskorna ávexti, brauðmeti eða kökur sem ekki eru mjög óhollar. Ekkert mótsgjald verður á leikana. Nánari upplýsingar verða settar inn undir tenglinum krakkablak hér til hliðar. Nánar

Byrjendatímar í blaki

Blak | 23.02.2011 Blakfélagið Skellur hefur ákveðið að fara í átak til að ná inn fleiri fullorðnum iðkendum í blakið. Boðið er upp á sérstaka byrjendatíma í blaki á miðvikudögum klukkan 20 í íþróttahúsinu við Austurveg. Blak er holl og skemmtileg íþrótt sem allir geta lært. Heilmikil hreyfing og góður félagsskapur. Æfingagjald er aðeins kr. 1000 á mánuði fyrir byrjendatímana. Þjálfari er Jamie Landry. Nánar

Skellur enn taplausar í 3. deild

Blak | 21.02.2011 Kvennalið Skells átti gott mót núna um helgina í 3. deild Íslandsmótsins. Þær spiluðu sex leiki og unnu þá alla. Fjórir leikir voru spilaðir á laugardeginum og unnust þeir allir 2-0. Tveir leikir voru á sunnudeginum og voru úrslitin í þeim báðum 2-1 í hörku spennandi leikjum. Allir leikmenn spiluðu vel og liðið small vel saman. Liðið samanstendur af „eldri“ leikmönnum Skells og stúlkum frá Bandaríkjunum og Kanada sem stunda nám við Háskólasetur Vestfjarða og það er gaman að sjá hvað hópurinn nær vel saman í spilinu. Úrslitamótið í 3. deild verður dagana 25. og 26. mars.

Carrie var dugleg að taka myndir og verða þær settar inn á síðuna innan skamms. Nánar

3. deild kvenna og yngri flokkar

Blak | 16.02.2011

Blakæfingar hjá yngri flokkum falla niður á föstudaginn. Ástæðan er sú að kvennalið Skells er að fara á 3. deildar mót um helgina og þar með allir þjálfarar félagsins. Á 3. deildar mótinu sem haldið var hér á Ísafirði í haust endaði Skellur í 1. sæti í sínum riðli. Nú á næsta móti verður hópnum skipt upp í 3. deild annars vegar og 4. deild hinsvegar og mun Skellur að sjálfsögðu spila í 3. deild. Konurnar eru staðráðnar í að fylgja eftir góðum árangri en ljóst er að það verður ekki auðvelt því liðið gæti mætt fleiri erfiðum andstæðingum en á síðasta móti. Jamie Landry, þjálfari félagsins og lykil-leikmaður slasaðist á ökkla á æfingu um daginn, en vonast er til þess að hún nái að spila með á mótinu þrátt fyrir meiðslin.

Nánar